پرەمەر-ليگادا ٶنەر كٶرسەتەتٸن «اقجايىق» فۋتبول كلۋبىنىڭ باس باپكەرٸ, ۋكراينالىق مامان ۆلاديمير مازيار ورنىندا قالاتىن بولدى, دەپ حابارلايدى قازاقپارات.
مازيار ەل چەمپيوناتىنىڭ 16-تۋرىندا الماتىدا «قايراتپەن» ٶتكەن ماتچتان كەيٸن ٶز ورنىنان كەتەتٸنٸ جٶنٸندە مەلٸمدەگەن بولاتىن.
«اقجايىق» فۋتبول كلۋبىنىڭ باسشىلىعى وسىدان سوڭ ويىنشىلار مەن باس باپكەردٸڭ اراسىندا كەزدەسۋ ٶتكٸزگەن.
«كلۋب ويىنشىلارى باپكەردٸ تولىقتاي قولدادى – بۇل باسشىلىققا ونىڭ ورنىنان كەتۋٸ جٶنٸندەگٸ ٶتٸنٸشٸن قابىلداماۋعا نەگٸز بولدى. جازعى ترانسفەرلٸك كەزەڭدە كوماندا جاڭا ويىنشىلارمەن كٷشەيتٸلەدٸ. بۇل كوماندانىڭ ٸشٸندەگٸ بەسەكەلەستٸكتٸ ارتتىرىپ, جاعدايدى تٷزەۋگە سەپتەسەدٸ», - دەپ حابارلادى «اقجايىق» فۋتبول كلۋبىنان.
قازٸرگٸ كەزدە ورالدىقتار تۋرنير كەستەسٸندە 12 ۇپايمەن 13-ورىندا, ياعني بٸرٸنشٸ ليگاعا تٷسٸپ قالۋ قاۋپٸ تٶنٸپ تۇر.
«اقجايىق» 8 شٸلدە كٷنٸ قازاقستان كۋبوگى ٷشٸن قىزىلوردادا جەرگٸلٸكتٸ «قايسارمەن» كەزدەسەدٸ.
