ۇلتتىق بانك تٶراعاسى دانييار اقىشەۆ "7-20-25" جاڭا تۇرعىن ٷي باعدارلاماسى قاشان باستالاتىنىن ناقتىلادى, دەپ حابارلايدى Sputnik قازاقستان تٸلشٸسٸ.
"7-20-25" باعدارلاماسىن مامىردا قوسامىز دەپ ەشكٸم ۋەدە بەرگەن جوق. باعدارلاما وسى جىلدىڭ ەكٸنشٸ جارتىسىندا باستالۋى ٷشٸن مامىردا بارلىق قاجەتتٸ قۇجاتتى قابىلداۋعا دايىنبىز دەدٸك. ونىڭ ٷستٸنە باعدارلامانى سەتتٸ ٸسكە قوسۋ ٷشٸن زاڭنامالىق ٶزگەرٸستەر قاجەت. قازٸر دەل سول ٶزگەرٸستەر سەناتتىڭ قاراۋىندا جاتقان "ۆاليۋتالىق رەتتەۋ تۋرالى" زاڭ جوباسىنا ەنگٸزٸلگەن. بۇل تٷزەتۋلەرسٸز باعدارلامانى ٸسكە قوسۋ قيىن", — دەدٸ اقىشەۆ سەنات كۋلۋارىندا.
ۇلتتىق بانك باسشىسى باعدارلاما قابىلدانعانىن, "باسپانا" يپوتەكالىق ۇيىمى قۇرىلعانىن اتاپ ٶتتٸ.
"قازٸر اتالعان ۇيىم ەدٸلەت ورگاندارىندا تٸركەۋدەن ٶتٸپ جاتىر. ەگەر بٸز بارلىق شارتتى ورىنداساق, باعدارلامانى وسى جىلدىڭ ەكٸنشٸ جارتىجىلدىعىنان باستاپ ٸسكە اسىرۋعا كٸرٸسەمٸز. ونىڭ ٷستٸنە ەكٸنشٸ دەڭگەيلٸ بانكتەرمەن بارلىق مەسەلەنٸ پىسىقتادىق, قارجى سەكتورىمەن ٶتە كٶپ كەزدەسۋ ٶتتٸ. ٶيتكەنٸ ەرتەڭ ازاماتتار وسى بانكتەرگە جٷگٸنەدٸ. قازٸر ۇلتتىق بانك پەن ەكٸنشٸ دەڭگەيلٸ بانكتەر تاراپىنان ەشقانداي پروبلەما كٶرٸپ تۇرعان جوقپىز", — دەپ تٷيٸندەدٸ ول.
