اقتٶبەدە بەس قاباتتى تۇرعىن ٷيدٸڭ بالكونى جانىپ, سول كٷنٸ دەمالىستا بولعان ٶرت سٶندٸرۋشٸ مۇڭالبەك قۇلىمباي ونى كەزدەيسوق كٶرٸپ قالعان. ول العاش بوپ كٶمەك كٶرسەتٸپ, قارييانى ارقالاپ دالاعا شىعاردى, دەپ حابارلايدى قازاقپارات.
اقتٶبە قالاسىنداعى پروحوروۆ كٶشەسٸندە ورنالاسقان بەس قاباتتى تۇرعىن ٷيدٸڭ پەتەرٸ ٶرتەنگەن كەزدە الدىمەن №1 مامانداندىرىلعان ٶرت سٶندٸرۋ بٶلٸمٸنٸڭ قىزمەتكەرٸ مۇڭالبەك ٸليياسوۆ كٶمەككە باردى. ول دەمالىستا بولىپ, وتباسىمەن دالاعا شىققاندا تٷتٸندٸ بٸردەن كٶزٸ شالعان. ويلانباستان كٶپقاباتتى ٷيگە كٸرٸپ, بارلىق ەسٸكتٸ قاعىپ, دالاعا شىعۋىن سۇراعان. ال وت شىعىپ, قىزىل جالىنعا ورانعان پەتەر ەسٸگٸ اشىق تۇرعانىمەن ەشكٸم شاقىرمادى, كٶمەك سۇرامادى. پەتەردەن 8 جاستاعى بالا قاشىپ شىعىپ, زەينەركەر قالىپ قويعان.
«وسىنداي سەتتە قۇتقارۋشىنىڭ جانىڭدا بولعان قانداي باقىت. جانىپ جاتقان پەتەردٸڭ تٷتٸنٸ مەنٸڭ كٸرەبەرٸس بٶلمەمدٸ تەز شارپىپ كەتتٸ. اس بٶلمەدە قىزىم بٸر نەرسەگە بٶگەلٸپ قالدى, ال مەن كٶزدٸ اشىتقىش تٷتٸننەن قالاي ساقتانۋ كەرەك ەكەنٸن بٸلمەدٸم. مەنٸڭ كٶزٸم كٶرمەيتٸن, ونىڭ ٷستٸنە اياعىم اۋىرادى. سول سەتتە ەسٸكتەن مىنا جٸگٸت, مۇڭالبەك كٸردٸ. ول ويلانباستان, اۋىر سالماعىما قاراماستان مەنٸ ارقاسىنا سالىپ, باسپالداقپەن تٶمەن قاراي تٷسٸپ, اۋلاعا الىپ شىقتى. مەنٸ ورىندىققا وتىرعىزىپ, قايتا كٸرەبەرٸسكە قاراي جٷگٸرٸپ كەتتٸ. ول ناعىز باتىر, التىن جٷرەك», - دەدٸ قالا تۇرعىنى 66 جاستاعى قارييا التىن ٸليياسوۆا.
ايتا كەتەيٸك, ٶرت كەزٸندە بارلىعى 30 ادام ەۆاكۋاتسييالاندى. ولاردىڭ بەسەۋٸ بالا.
«مۇڭالبەك قۇلىمباي تۇرعىنداردى قاۋٸپسٸز جەرگە كٶشٸرٸپ ٷلگەرۋدٸ ويلادى. بٸر ٶزٸ بار كٷشٸن سالىپ, ٷيگە قايتا كٸرٸپ, بەرٸنە ەسكەرتۋ بەرگەننەن كەيٸن وعان كٶمەككە ٶزگە ٶرت سٶندٸرۋشٸلەر كەلدٸ. ەكٸ كٶلٸك پەن 12 ادام لەزدە ٶرتتٸ سٶندٸردٸ. سونىمەن قاتار ٷي گازدان, ەلەكتر توگىنان اجىراتىلدى», - دەپ حابارلادى وبلىستىق تجد باسپاسٶز قىزمەتٸ.
