اقتٶبەلٸك ازامات ميربولات جامانقۇلوۆ سيريياعا كەتكەن كەلٸنشەگٸ اقمارال الماعامبەتوۆانى ٸز-تٷسسٸز جوعالدى دەپ تانۋدى سۇرادى. ول كەلٸنشەگٸنەن اجىراسۋدى ماقسات ەتٸپ وتىر, دەپ حابارلايدى "ۇلت اقپارات" Bnews.kz پورتالىنا سٸلتەمە جاساپ.
اقتٶبە قالاسىنىڭ تۇرعىنى 29 جاستاعى ا.ايماعامبەتوۆا وسىدان ٷش جىل بۇرىن «الماتىعا بارامىن» دەگەن جەلەۋمەن ٷيٸنەن كەتٸپ قالعان. ٷش بالانىڭ اناسى سول كەتكەننەن وتباسىنا قايتا ورالمادى. جۇبايىن كٷتكەن م.جامانقۇلوۆ №2 قالالىق سوتىنا ارىز تٷسٸرٸپ, كەلٸنشەگٸن ٸز-تٷسسٸز جوعالدى دەپ تانۋدى سۇرادى. ونىڭ ايتۋىنشا, ا.ايماعامبەتوۆا حابارسىز كەتٸپ, كەيٸن ٶزٸنٸڭ سيرييادا جٷرگەنٸن, جاعدايىنىڭ جاقسى ەكەنٸن ايتىپ, تەلەفون شالعان.
«ازاماتتىق ٸس بويىنشا ارىزدانۋشى ميربولات جامانقۇلوۆ جەرگٸلٸكتٸ, رەسپۋبليكالىق گازەتكە, اقپاراتتىق پورتالدارعا كەلٸنشەگٸ اقمارال ايماعامبەتوۆانىڭ ٸز-تٷسسٸز جوعالعانىن ايتىپ حابار بەرۋٸ قاجەت. قانداي دا بٸر اقپارات بٸلەتٸن ادامنان ٷش ايدا سوتقا حابار بەرۋٸ سۇرالادى»,- دەدٸ سۋديا گاۋھار ورالباي.
ايتا كەتەيٸك, زاڭ بويىنشا ارىزدانۋشى ٶز قارجىسىنا جۇبايى ا.ايماعامبەتوۆانىڭ جوعالعانى تۋرالى حابار بەرۋٸ تيٸس. ەگەر بۇل ۋاقىتتا حابار بولماسا, ٸز-تٷسسٸز جوعالدى دەپ تانىلىپ, اجىراسۋعا مٷمكٸندٸك بەرٸلەدٸ.
