اقتٶبەدە سەرٸكتەستٸكتٸڭ كٷزەتشٸلەرٸنەن اقشا تولى سٶمكەنٸ الىپ كەتكەن كٷدٸكتٸلەر ۇستالدى, دەپ حابارلايدى "ۇلت اقپارات".
وقيعا بيىل 14 اقپان كٷنٸ تٸركەلدٸ.
سول كٷنٸ ساعات 19:00-دە مەرتٶك اۋدانىنىڭ كەزەكشٸ بٶلٸمٸنە حابارلاسقان ادامدار جايساڭ اۋىلىندا بەلگٸسٸز توپتىڭ اقشا سالىنعان سٶمكەنٸ الىپ, اقتٶبە قالاسىنا قاراي «Daewoo Nexia» اۆتوكٶلٸگٸمەن كەتٸپ قالعانىن ايتتى.
سول كٷنٸ ساعات 17:00-دە تٶرت ادام جايساڭدا ورنالاسقان جالدامالى ٷيگە زاڭسىز كٸرگەن.
ولار قارۋ قولدانىپ, زورلىق-زومبىلىق كٶرسەتٸپ, سەرٸكتەستٸكتٸڭ كٷزەتشٸلەرٸن ۇرىپ-سوققان.
قاراقشىلىق شابۋىل جاساپ, اقشا تولى سٶمكەنٸ الىپ كەتتٸ.
وندا 7 ميلليون تەڭگە اقشا بولعان.
«كريمينالدىق پوليتسييا قىزمەتكەرلەرٸ ەكٸ كٷدٸكتٸنٸ بٸردەن ۇستادى. ال ەكەۋٸ وسى ۋاقىتقا دەيٸن قاشىپ جٷردٸ. ولارعا مەملەكەتارالىق ٸزدەۋ جارييالاندى. بٸرەر كٷن بۇرىن پوليتسييا قىزمەتكەرلەرٸ اقتٶبە قالاسىندا ٸزدەۋ جٷرگٸزٸپ, قالعان ەكەۋٸن تاپتى. قازٸر اقتٶبە قالاسىنداعى ۋاقىتشا ۇستاۋ يزولياتورىندا وتىر», - دەپ حابارلادى وبلىستىق پد باسپاسٶز قىزمەتٸ.
وسى وقيعا بويىنشا قىلمىستىق كودەكستٸڭ «قاراقشىلىق» بابى بويىنشا ٸس قوزعالىپ, تەرگەۋ جٷرٸپ جاتىر.
