فوتو: polisia.kz
اقتٶبە وبلىسىندا بولعان جانتٷرشٸگەرلٸك جول اپاتىنان كەيٸن رەسپۋبليكا كٷنٸنە ارنالعان مەرەكەلٸك گالا-كونتسەرت پەن وتشاشۋدى ٶتكٸزبەۋگە شەشٸم قابىلداندى, دەپ حابارلايدى اقتٶبە وبلىسى ەكٸمدٸگٸنٸڭ باسپاسٶز قىزمەتٸ.
گالا-كونتسەرت پەن وتشاشۋ وبلىس ورتالىعىنىڭ الاڭىندا ٶتكٸزۋ جوسپارلانعان بولاتىن. بٸراق ەكٸمدٸك مەرەكەلٸك شارالاردى ٶتكٸزبەۋگە شەشٸم شىعاردى.
"قۇرمەتتٸ قالا تۇرعىندارى مەن قوناقتارى! 25 قازان كٷنٸ ساعات 19:00-دە "قازاق حالقىنا مىڭ العىس" الاڭىندا ٶتكٸزۋ جوسپارلانعان گالا-كونتسەرت پەن وتشاشۋ ٶڭٸردە بولعان قايعىلى جاعدايعا بايلانىستى ٶتپەيتٸندٸگٸن حابارلايمىز", - دەلٸنگەن رەسمي حابارلامادا.
ەسكە سالا كەتەيٸك, كەشە تاڭعى ساعات 08:40 شاماسىندا اقتٶبە وبلىسىندا بەلقوپا اۋىلىنىڭ ماڭىندا جانتٷرشٸگەرلٸك جول اپاتى بولىپ, 12 ادام كٶز جۇمدى. ولاردىڭ اراسىندا ەكٸ بالا بار. امان قالعان 6 جولاۋشى حرومتاۋ اۋداندىق اۋرۋحاناسىنا جەتكٸزٸلدٸ.
