سولدان وڭعا قاراي: فينلياندييا پرەزيدەنتٸ ساۋلي نيينيستە, اقش پرەزيدەنتٸ دجو بايدەن جەنە شۆەتسييا پرەمەر-مينيسترٸ ماگدالەنا اندەرسسون. ۆاشينگتون, 19 مامىر 2022 جىل.
سەرسەنبٸدە اقش كونگرەسٸ فينلياندييا مەن شۆەتسييانى ناتو-عا مٷشەلٸككە قابىلداۋ تۋرالى كەلٸسٸمدٸ ماقۇلدادى. كەلٸسٸمگە 95 سەناتور داۋىس بەرٸپ, بٸر ادام قارسى بولدى.
"فينلياندييا مەن شۆەتسييانىڭ مٷشەلٸگٸ ناتو-نى نىعايتا تٷسەدٸ. بۇل رەسەي باسقىنشىلىعى تۇسىندا, پۋتيننٸڭ ۋكرايناداعى ەدٸلەتسٸز, ادامگەرشٸلٸككە جات سوعىسى تۇسىندا ٶتە ماڭىزدى" دەدٸ سەناتتا باسىم كٶپشٸلٸك بولىپ وتىرعان دەموكراتتار جەتەكشٸسٸ چاك شۋمەر.
اقش پرەزيدەنتٸ دجو بايدەن شەشٸمدٸ قوس پارتييانىڭ ناتو-نى قولداۋ نيەتٸنٸڭ كٶرٸنٸسٸ دەپ باعالادى.
فينلياندييا مەن شۆەتسييانى ناتو-عا قابىلداۋ تۋرالى كەلٸسٸمدٸ وداققا مٷشە 30 ەلدٸڭ بارلىعى قولداۋى تيٸس. 23 مەملەكەت ارنايى شەشٸم قابىلداپ قويعان. شۆەتسييا مەن فينلياندييانى كٷردتەرگە ساياسي باسپانا بەردٸ دەپ كٸنەلاعان تٷركييانىڭ ۇستانىمى ەزٸرگە بۇلىڭعىر. ٷش مەملەكەت اراسىندا بۇل مەسەلە بويىنشا كەلٸسٸم بولعانمەن, تٷركييا باسشىسى رەجەپ ەردوعاننىڭ كانديداتتارعا ايتاتىن "سىن-ەسكەرتپەلەرٸ" بار. ناتو-عا ەكٸ مەملەكەتتٸ قابىلداۋ پروتسەسٸ وداقتىڭ 70 جىلدىق تاريحىنداعى ەڭ جەدەل شەشٸمدەردٸڭ بٸرٸ بولايىن دەپ تۇر.
