جاپپاي ۆاكتسينالاۋ ٸسٸ باياۋ قوزعالىپ جاتقان اقش-تا كوروناۆيرۋس ٸندەتٸ ودان ەرٸ ٶرشٸپ, باقىلاۋدان شىعىپ بارادى. 8 قاراشا كٷنٸ ەلدە كوروناۆيرۋس جۇقتىرعانداردىڭ كٷندەلٸك سانى رەكورد جاڭارتتى. بٸر كٷندە 310 مىڭ ناۋقاس تٸركەلدٸ. اۋرۋدان قايتىس بولعاندار 3777 ادامعا ارتىپ, 370 مىڭعا جۋىقتادى.
330 ميلليون تۇرعىنى بار اقش-تا جەلتوقساننىڭ ورتاسىندا جاپپاي ۆاكتسينالاۋ ناۋقانى باستالعان. الايدا بۇل ٸس باياۋ قوزعالىپ جاتىر. بار بولعانى تەك 6 ميلليون ادامعا ەكٸ رەت سالىناتىن ۆاكتسينانىڭ العاشقى بٶلٸگٸ سالىنعان.
ال ۇلىبريتانييادا تەۋلٸك ٸشٸندەگٸ Covid ٶلٸمٸ رەكورد جاڭارتتى. بٸر كٷندە 1325 ٶلٸم تٸركەلٸپ, كوروناۆيرۋستان قايتىس بولعاندار سانى 80 مىڭعا جۋىقتادى. بۇعان دەيٸنگٸ رەكورد بىلتىر سەۋٸردە بولعان. ول كەزدە 1224 ٶلٸم تٸركەلگەن.
ەلدە "كوروناۆيرۋس جۇقتىرعانداي ەرەكەت ەت" دەيتٸن ناۋقان باستالدى. ەلدە 8 قاڭتار كٷنٸ كوروناۆيرۋس جۇقتىرعانى راستالعاندار سانى 68 مىڭعا ارتىپ, بارلىعى 2 ميلليون 957 مىڭعا جەتتٸ.
لوندون مەرٸ ساديك حان اۋرۋحانالاردىڭ لىق تولۋىنا بايلانىستى تٶتەنشە جاعداي جارييالادى.
"ەگەر ۆيرۋستىڭ تاراۋىن دەرەۋ توقتاتپاساق, اۋرۋحانالاردا ناۋقاستاردى قابىلدايتىن تٶسەك قالمايدى" دەدٸ ول.
8 قاڭتار كٷنٸ يسپانييادا 25 456 Covid ناۋقاسى تٸركەلدٸ. بۇل – ٸندەت باستالعالى ەكٸنشٸ ەڭ جوعارى كٶرسەتكٸش. دجونس حوپكينس ۋنيۆەرسيتەتٸنٸڭ دەرەگٸنە قاراعاندا, ەلدە ۆيرۋس جۇقتىرعانى راستالعاندار سانى 2 ميلليون 50,3 مىڭ ادامعا جەتكەن, اۋرۋدان 60 مىڭعا جۋىق ادام قايتىس بولعان.
كوروناۆيرۋستان قايتىس بولعانداردىڭ كٷندەلٸك سانى گەرمانييادا دا رەكورد جاڭارتتى. ەلدٸ بٸر كٷندٸ 1188 Covid ٶلٸمٸ تٸركەلٸپ, اۋرۋدان قايتىس بولعاندار سانى 38,7 مىڭعا جەتتٸ. مۇنىڭ الدىنداعى رەكورد 30 جەلتوقسان كٷنٸ بولعان. ول كٷنٸ 1129 ٶلٸم انىقتالعان. ەلدە بٸر كٷندە 31,8 مىڭ ادامنىڭ كوروناۆيرۋس ينفەكتسيياسىن جۇقتىرعانى راستالدى. ال اۋرۋعا شالدىققانداردىڭ جالپى سانى وسىمەن 1,9 ميلليونعا جۋىقتادى.
