اقمولا وبلىسىنىڭ شورتاندى كەنتٸندە گاز باللونى جارىلىسىنان زارداپ شەككەن 10 جاسار قىز اۋرۋحانادا كٶز جۇمدى, دەپ حابارلايدى قازاقپارات.
«ٶكٸنٸشكە وراي, شورتاندى اۋىلىنداعى جارىلىس سالدارىنان زارداپ شەككەن 2011 جىلى تۋعان بالا كەشە 22 قاراشا كٷنٸ كەشكە كٶز جۇمدى. قىز بالا ەلوردالىق اۋرۋحاناعا ٶتە اۋىر جاعدايدا جەتكٸزٸلگەن. ول دەرەۋ جانساقتاۋ بٶلٸمشەسٸنە جاتقىزىلدى, ٶيتكەنٸ جاعدايى ٶتە اۋىر بولدى. دەنەنٸڭ تەرمييالىق كٷيٸگٸ - 60 پايىز, بالا كومادا بولدى», - دەدٸ نۇر-سۇلتان قالاسىنىڭ قوعامدىق دەنساۋلىق ساقتاۋ باسقارماسىنىڭ باسپاسٶز قىزمەتٸندەگٸلەر.
ۆەدومستۆودان اتاپ ٶتكەكەندەي, بارلىق جٷرگٸزٸلگەن ەمدەۋ شارالارىنا قاراماستان, جانساقتاۋ بٶلٸمشەسٸندە ناۋقاستى قۇتقارۋ مٷمكٸن بولمادى.
ايتا كەتەيٸك, 16 قاراشا كٷنٸ اقمولا وبلىسىنىڭ شورتاندى كەنتٸندە گاز باللونى جارىلىپ, 3 ادام كٶز جۇمدى, تاعى ون ادام اۋرۋحاناعا تٷستٸ. وقىس وقيعا تٷنگٸ ساعات 22:00 شاماسىندا شورتاندى كەنتٸندە ورنالاسقان ٷش پەتەرلٸ تۇرعىن ٷيدە بولدى. گاز باللونىنىڭ جارىلۋى سالدارىنان 3 پەتەرلٸ جەكە ٷي ٶرتەنٸپ, ونىڭ بٸر بٶلٸگٸ قۇلادى.
اۋرۋحاناعا تٷسكەندەردٸڭ اراسىندا دەنەسٸنٸڭ 70 پايىزى تەرمييالىق كٷيٸك شالعان 12 جاستاعى ەر بالا 20 قاراشادا كٶز جۇمدى.
