18 سەۋٸر كٷنٸ تاڭەرتەڭ اقمولا وبلىسى ارشالى اۋدانىندا بەلگٸسٸز بٸرەۋلەر مەملەكەتتٸك مەكەمەنٸڭ عيماراتىن ٶرتەپ جٸبەرگەن, - دەپ حابارلايدى Tengrinews.kz تٸلشٸسٸ Polisia.kz سايتىنا سٸلتەمە جاساپ.
كەلەسٸ كٷنٸ جەرگٸلٸكتٸ اتقارۋشى ورگاننىڭ قىزمەتكەرٸ بۇل تۋرالى پوليتسيياعا حابارلاپ, ٶرت قويعانداردى تاۋىپ, ولارعا شارا قولدانۋدى سۇراعان.
ٶرتتٸ ارشالى اۋدانىنىڭ جەدەل تەرگەۋ توبى وقشاۋلاعان. قازا تاپقاندار مەن زارداپ شەككەندەر جوق. كەلتٸرٸلگەن شىعىن كٶلەمٸ - 6 ميلليون تەڭگە.
"وقيعا ورنىنا جەتكەن جەدەل تەرگەۋ توبى مەملەكەتتٸك ورگان عيماراتىنان ٶرت شىققانىن انىقتادى. ٶرت تٷنگٸ ساعات 03.30 شاماسىندا بولعان. قازٸر ٶرت وشاعى انىقتالىپ جاتىر", - دەپ حابارلايدى پوليتسييا.
ٶرتەنگەن عيماراتتان ٶزٸندٸك يٸسٸ بار 3 ليترلٸك شىنى قۇتى مەن پلاستيكتەن جاسالعان زات تابىلدى.
اتالعان دەرەككە قاتىستى قىلمىستىق كودەكستٸڭ 202-بابى 2-تارماعى "بٶتەننٸڭ مٷلكٸن قاساقانا جويۋ نەمەسە بٷلدٸرۋ" بويىنشا سوتقا دەيٸنگٸ تەرگەۋ باستالدى. پوليتسييا وسى قىلمىسقا قاتىسى بار ادامداردى انىقتاۋ ٷشٸن جەدەل ٸزدەستٸرۋ شارالارىن جٷرگٸزٸپ, كۋەگەرلەردەن جاۋاپ الىپ جاتىر.
وسى قىلمىستى جاساعان نەمەسە وعان قاتىسى بار ادامداردى انىقتاۋ ٷشٸن جەدەل-ٸزدەستٸرۋ ٸس-شارالارى جٷرگٸزٸلٸپ جاتىر.
