پارا بەرٸپ بٸرەۋدٸ بايىتقانشا, سالىنعان ايىپپۇلدى ٶتەپ بيۋدجەتتٸ تولىقتىرعان دۇرىس. سىبايلاس جەمقورلىققا قارسى ٸس-قيمىل اگەنتتٸگٸنٸڭ سەرٸكتەستٸك دەپارتامەنتٸنٸڭ ديرەكتورى راسۋل مەدەتوۆ وسىنداي پٸكٸر بٸلدٸردٸ, دەپ حابارلايدى "ۇلت اقپارات".
«سىبايلاس جەمقورلىق دەگەن كەزدە كٶپ ادامنىڭ ەسٸنە جول پوليتسيياسى قىزمەتكەرلەرٸ تٷسەدٸ. بٸراق ادام ٶزٸن دە كٸنەلاي بٸلۋٸ كەرەك. بۇل سٶزٸمە كەلٸسەتٸندەر دە, كەلٸسپەيتٸندەر دە تابىلاتىنىن بٸلەمٸن. مەسەلەن, جول ەرەجەسٸن بەلگٸلٸ بٸر ادام بۇزعاننان كەيٸن ونى جولپول قىزمەتكەرلەرٸ ۇستايتىن بولسا, جول ەرەجەسٸن بۇزعان ازامات پارانى ٶزٸ ۇسىنادى. «كەلٸسەيٸك» دەيدٸ دە, بەلگٸلٸ بٸر پاراسىن بەرٸپ, جٶنٸنە كەتەدٸ. كەتكەننەن كەيٸن «بٷكٸل پوليتسييا وڭباعان, ولار جەمقورلىققا جول بەرەدٸ» دەيدٸ. ٶزدەرٸ باستايتىنىن ەسكەرە بەرمەيدٸ», - دەدٸ راسۋل مەدەتوۆ اگەنتتٸكتٸڭ فەيسبۋك پاراقشاسىنداعى سۇحباتتا سٶيلەگەن سٶزٸندە.
ونىڭ ايتۋىنشا ەرەجەنٸ بۇزعان ادام ايىپپۇلدى تٶلەۋٸ كەرەك.
«نەگە بٸز باسقا بٸرەۋدٸ بايىتۋىمىز كەرەك. ايىپپۇل جازىپ بەرسٸن. ايىپپۇل بيۋدجەتكە بارادى. بيۋدجەتكە بارعان قاراجات حالىققا قايتىپ كەلەدٸ. قالاي كەلەدٸ: ول اقشاعا بالاقباقشا نەمەسە اۋرۋحاناعا سالىنۋى مٷمكٸن. جول جٶندەلۋٸ ىقتيمال. سوندىقتان ايىپپۇلدى بيۋدجەتكە جولداپ, اقشا بالالارعا قايتىپ كەلەتٸندەي جاعداي جاساۋ كەرەك», - دەدٸ ول.
