قازاقستان مۇسىلماندارى دٸني باسقارماسىنىڭ تٶراعاسى, باس مٷفتي ناۋرىزباي قاجى تاعانۇلى قوعامداعى وتباسىلىق زورلىق-زومبىلىق مەسەلەسٸنە بايلانىستى ٷندەۋ جاسادى, دەپ حابارلايدى ult.kz.
باس مٷفتيدٸڭ ايتۋىنشا, وتباسى – ادام ٶزٸن قاۋٸپسٸز ەرٸ جايلى سەزٸنەتٸن ورتا بولۋى كەرەك. ال ەيەلدٸڭ ٶز شاڭىراعىندا قورلىق كٶرۋٸ – قوعامدى الاڭداتاتىن مەسەلە.
«ەيەل – بٸر شاڭىراقتىڭ شىراعى. بٸرەۋدٸڭ ايالاپ ٶسٸرگەن قىزى, بٸرەۋدٸڭ اسىل اناسى, بٸرەۋدٸڭ سٷيٸكتٸ جارى. ول جاڭا تٷسكەن شاڭىراعىنا قورعانىش پەن جىلۋلىق ٸزدەپ كەلەدٸ. سوندىقتان ەر ازاماتتىڭ مٸندەتٸ – وعان قورقىنىش ەمەس, قامقورلىق سىيلاۋ», – دەدٸ ناۋرىزباي قاجى تاعانۇلى.
ول ەر ادامنىڭ كٷشٸن جۇدىرىعىمەن ەمەس, سابىرىمەن كٶرسەتۋٸ كەرەكتٸگٸن اتاپ ٶتتٸ.
«ەر ادامنىڭ كٷشٸ جۇدىرىعىندا ەمەس. ناعىز كٷش – اشۋعا ەرٸك بەرمەي, سابىر ساقتاي بٸلۋدە, جانىڭداعى جاندى جىلاتپاي, كەرٸسٸنشە وعان سٷيەنٸش بولۋدا. اشۋ باسىلادى. ۇرىس تا ۇمىتىلادى. بٸراق اشۋمەن كٶتەرٸلگەن قول مەن ايتىلعان اۋىر سٶز ادامنىڭ جٷرەگٸندە ۇزاق ۋاقىتقا ٸز قالدىرۋى مٷمكٸن», – دەدٸ باس مٷفتي.
ناۋرىزباي قاجى تاعانۇلى وتباسىنداعى زورلىقتىڭ سالدارى بٸر سەتتٸك اشۋمەن شەكتەلمەيتٸنٸن ايتىپ, ەر ازاماتتاردى جاۋاپكەرشٸلٸككە شاقىردى.
«وتباسى ادام ٶزٸن ەڭ قاۋٸپسٸز سەزٸنەتٸن مەكەن بولۋى كەرەك. ەيەل ٶز ٷيٸندە قورقىپ ەمەس, قادٸرلەنٸپ ٶمٸر سٷرۋگە تيٸس. قىز بالاسىن ايالاپ ٶسٸرٸپ, اق بوساعادان ٷلكەن ٷمٸتپەن شىعارىپ سالعان ەربٸر ەكە مەن انانىڭ تٸلەگٸ بٸرەۋ – بارعان جەرٸندە باقىتتى بولسىن. سول اماناتقا قييانات جاسامايىق», – دەدٸ ول.
باس مٷفتي سٶزٸن «ەيەلدٸ جىلاتۋ – ازاماتتىق ەمەس. ەيەلگە قورعان بولۋ – ەردٸڭ مٸندەتٸ» دەگەن ٷندەۋمەن قورىتىندىلادى.
