Qazaqstan musylmandary dini basqarmasynyń tóraǵasy, Bas múfti Naýryzbai qajy Taǵanuly qoǵamdaǵy otbasylyq zorlyq-zombylyq máselesine bailanysty úndeý jasady, dep habarlaidy ult.kz.
Bas múftidiń aitýynsha, otbasy – adam ózin qaýipsiz ári jaily sezinetin orta bolýy kerek. Al áieldiń óz shańyraǵynda qorlyq kórýi – qoǵamdy alańdatatyn másele.
«Áiel – bir shańyraqtyń shyraǵy. Bireýdiń aialap ósirgen qyzy, bireýdiń asyl anasy, bireýdiń súiikti jary. Ol jańa túsken shańyraǵyna qorǵanysh pen jylýlyq izdep keledi. Sondyqtan er azamattyń mindeti – oǵan qorqynysh emes, qamqorlyq syilaý», – dedi Naýryzbai qajy Taǵanuly.
Ol er adamnyń kúshin judyryǵymen emes, sabyrymen kórsetýi kerektigin atap ótti.
«Er adamnyń kúshi judyryǵynda emes. Naǵyz kúsh – ashýǵa erik bermei, sabyr saqtai bilýde, janyńdaǵy jandy jylatpai, kerisinshe oǵan súienish bolýda. Ashý basylady. Urys ta umytylady. Biraq ashýmen kóterilgen qol men aitylǵan aýyr sóz adamnyń júreginde uzaq ýaqytqa iz qaldyrýy múmkin», – dedi Bas múfti.
Naýryzbai qajy Taǵanuly otbasyndaǵy zorlyqtyń saldary bir sáttik ashýmen shektelmeitinin aityp, er azamattardy jaýapkershilikke shaqyrdy.
«Otbasy adam ózin eń qaýipsiz sezinetin meken bolýy kerek. Áiel óz úiinde qorqyp emes, qadirlenip ómir súrýge tiis. Qyz balasyn aialap ósirip, aq bosaǵadan úlken úmitpen shyǵaryp salǵan árbir áke men ananyń tilegi bireý – barǵan jerinde baqytty bolsyn. Sol amanatqa qiianat jasamaiyq», – dedi ol.
Bas múfti sózin «Áieldi jylatý – azamattyq emes. Áielge qorǵan bolý – erdiń mindeti» degen úndeýmen qorytyndylady.
