جامبىل وبلىسىندا پوليتسەيلەر 600 كەلٸگە جۋىق ەسٸرتكٸ زاتىن تەركٸلەدٸ. ٷش كٷدٸكتٸ ەسٸرتكٸ قۇرامداس ٶسٸمدٸكتەردٸ جيناپ جاتقان جەرٸنەن ۇستالعان, دەپ حابارلايدى ult.kz.
«قاراسورا-2026» جەدەل-پروفيلاكتيكالىق ٸس-شاراسى اياسىندا وبلىستىق پوليتسييا دەپارتامەنتٸنٸڭ ەسٸرتكٸ قىلمىسىنا قارسى ٸس-قيمىل باسقارماسى جەدەل-ٸزدەستٸرۋ شارالارىن جٷرگٸزگەن. وپەراتسيياعا ٸٸم-نٸڭ ەسٸرتكٸ قىلمىسىنا قارسى ٸس-قيمىل دەپارتامەنتٸ, ۇلتتىق ۇلاننىڭ 5513 ەسكەري بٶلٸمٸنٸڭ «بٷركٸت» ارنايى جاساعى جەنە پوليتسييانىڭ كينولوگييالىق ورتالىعىنىڭ قىزمەتكەرلەرٸ جۇمىلدىرىلعان.
ەسٸرتكٸ زاتتارىن ٸزدەۋگە Letta ەسٸمدٸ قىزمەتتٸك يت تە تارتىلعان.
پوليتسييانىڭ مەلٸمەتٸنشە, ت. رىسقۇلوۆ اۋدانىنداعى قوناەۆ اۋىلىنىڭ ماڭىنداعى قۇمدى القاپتا ٷش ەر ادام ۇستالعان. ولار ەسٸرتكٸ قۇرامداس ٶسٸمدٸكتەردٸ اسا ٸرٸ مٶلشەردە زاڭسىز جينادى دەگەن كٷدٸككە ٸلٸنگەن.
اۋماقتى تەكسەرۋ كەزٸندە جالپى سالماعى 595 كەلٸ 440 گرامم ەسٸرتكٸ زاتتارى مەن قۇرامىندا ەسٸرتكٸ بار ٶسٸمدٸكتەر تەركٸلەندٸ. سونىمەن قاتار ٶسٸمدٸكتەردٸ جيناۋعا پايدالانىلۋى مٷمكٸن ٷش وراق تابىلعان.
اتالعان دەرەك بويىنشا قر قىلمىستىق كودەكسٸنٸڭ 297-بابى 3-بٶلٸگٸمەن سوتقا دەيٸنگٸ تەرگەپ-تەكسەرۋ باستالدى. ٷش كٷدٸكتٸ ۋاقىتشا ۇستاۋ يزولياتورىنا قامالدى.
تەرگەۋ جالعاسىپ جاتىر.
