بٷگٸن شىمكەنت قالاسىندا جٶندەۋ جۇمىستارىنان ٶتكەن «مەتاللۋرگشٸلەر» ساياباعى قايتا پايدالانۋعا بەرٸلدٸ. 1 جەلتوقسان - تۇڭعىش پرەزيدەنت كٷنٸ مەرەكەسٸنە وراي ۇيىمداستىرىلعان سالتاناتتى شاراعا وڭتٷستٸك قازاقستان وبلىسىنىڭ ەكٸمٸ ج.تٷيمەباەۆ پەن قالا ەكٸمٸ نۇرلان ساۋرانباەۆ قاتىستى, دەپ حابارلايدى ۇلت.كز تٸلشٸسٸ.
اشىلۋ سالتاناتىندا سٶز العان ٶڭٸر باسشىسى تۇرعىندار مەن قوناقتاردى مەرەكەمەن قۇتتىقتاپ, قايتا جاڭعىرتىلعان ساياباقتىڭ 60 جىلدىق تاريحى بار ەكەنٸن اتاپ ٶتتٸ.
«ەلباسىنىڭ «بولاشاققا باعدار: رۋحاني جاڭعىرۋ» ماقالاسى بارشامىزدى جاڭعىرۋعا, جاڭارۋعا شاقىرادى. رۋحاني جاڭعىرۋ ٶزٸمٸزدٸ قۇرمەتتەۋدەن باستالادى. قالامىزدى تازا ۇستاساق, مەدەنيەتٸ جوعارى بولسا, تۇرمىسىمىز جەتٸلٸپ وتىرسا, وسىنداي ساياباقتاردا انالارىمىز, اپالارىمىز, بالالارىمىز قىدىرىپ, دەمالىپ جٷرسە, وسىدان اسقان باقىت جوق شىعار. رۋحاني جاڭعىرۋدىڭ بٸر بەلگٸسٸ وسى بولسا كەرەك. دەل وسىنداي ساياباقتاردىڭ قاتارى جىل ساناپ ارتىپ كەلەدٸ. قازٸرگٸ تاڭدا بۇرىنعى قورعاسىن زاۋىتىندا 40 گەكتار اۋماقتا جاڭا دەمالىس ايماعىنىڭ قۇرىلىسى جٷرٸپ جاتىر»,- دەدٸ جانسەيٸت قانسەيٸتۇلى.
ساياباقتىڭ اشىلۋ سالتاناتىندا ەلباسىنىڭ كۋرستاسى امانəلٸ Əبدرامانوۆ تا سٶز سٶيلەپ, تۇرعىندار تاراپىنان ىستىق ىقىلاسىن بٸلدٸردٸ.
«قالا ورتالىعىنداعى «مەتاللۋرگشٸلەر» ساياباعى بٷگٸن ادام تانىماستاي كەيٸپكە ەنٸپ, جاڭارىپ وتىر. وسى ٸستٸ قولعا العان وبلىس ەكٸمٸنە العىسىمىزدى بٸلدٸرەمٸز. قالامىز جىل ساناپ كٶركەيٸپ, دەمالىس ورىندارى مەن ساياباقتار قاتارى ارتىپ كەلەدٸ. بۇل دەگەنەمٸز ۇرپاق دەنساۋلىعىنا, اعا بۋىن ٶكٸلدەرٸنٸڭ عۇمىرىنىڭ ۇزاق بولۋىنا ٶز سەپتٸگٸن تيگٸزەتٸن دٷنيەلەر. الداعى جىلدارى مۇندا شاحمات وينايتىن ورتالىق, بالالارعا ارنالعان ويىن-ساۋىق قوندىرعىلارى ورناتىلماق» - دەدٸ امانəلٸ Əبدراحمانوۆ.
ايتا كەتسەك, شىمكەنت قالاسىنداعى «مەتاللۋرگشٸلەر» ساياباعىنىڭ ٸرگەتاسى 1957 جىلى قالانعان. قالپىنا كەلتٸرۋ جۇمىستارىنان سوڭ سايالى مەكەننٸڭ اۋماعى 3,6 گەكتاردان 5 گەكتارعا دەيٸن ۇلعايىپ وتىر. دەمالىس ايماعىندا سوڭعى ٷلگٸدەگٸ جارىق شامدار مەن قوقىس جەشٸكتەرٸ ورناتىلىپ, كەلۋشٸلەرگە كٶتەرٸڭكٸ كٶڭٸل كٷي سىيلايتىن سۋبۇرقاق تا سالىنعان.
