فوتو: pixabay.com
قىزىلوردا وبلىسىندا بيۋدجەت قاراجاتىن جىمقىرعانى ٷشٸن سوتتالعان اۋىلدىق كلۋبتىڭ ەسەپشٸسٸنە قاتىستى ٷكٸم قايتا قارالىپ, جازا مەرزٸمٸ ۇلعايتىلدى. بۇل تۋرالى باس پروكۋراتۋرا حابارلادى.
سوت دەرەگٸنشە, كلۋب ديرەكتورى مەن ەسەپشٸسٸ قىزمەتتٸك ٶكٸلەتتٸكتەرٸن پايدالانىپ, شامامەن ون جىل بويى جٷيەلٸ تٷردە قارجى جىمقىرىپ كەلگەن. ولار مەكەمە قىزمەتكەرلەرٸنە نەگٸزسٸز ارتىق جالاقى اۋدارىپ, كەيٸن تٷرلٸ سىلتاۋمەن قايتارىپ الىپ وتىرعان. كٶپ جاعدايدا قىزمەتكەرلەر بۇل ەرەكەتتەردٸڭ زاڭسىز ەكەنٸن بٸلمەگەن.
جالپى سوماسى 36 ميلليون تەڭگەنٸ قۇراعان زاڭسىز ەرەكەتتەرٸ ٷشٸن سوت باستاپقىدا ەكەۋٸن دە جەتٸ جىلعا باس بوستاندىعىنان ايىرعان. الايدا ەسەپشٸگە قاتىستى «كونستيتۋتسييانىڭ 30 جىلدىعىنا بايلانىستى امنيستييا تۋرالى» زاڭ قولدانىلىپ, جازا مەرزٸمٸ ٷشتەن بٸرٸنە قىسقارتىلىپ, 4 جىل 8 اي بولىپ بەلگٸلەنگەن.
كەيٸن سوت اكتٸلەرٸنٸڭ زاڭدىلىعى تەكسەرٸلگەن كەزدە امنيستييا نورماسىنىڭ دۇرىس قولدانىلماعانى انىقتالدى. پروكۋراتۋرا مۇنداي ساناتتاعى ٸستەرگە اتالعان زاڭنىڭ تەك ارنايى نورماسى قولدانىلۋى تيٸس ەكەنٸن اتاپ ٶتتٸ. ياعني, اسا ٸرٸ كٶلەمدە سەنٸپ تاپسىرىلعان مٷلٸكتٸ يەمدەنۋ نەمەسە الاياقتىق جاساعانى ٷشٸن جازا تەك بەستەن بٸر بٶلٸككە عانا قىسقارتىلۋى قاجەت.
قاداعالاۋ ورگانىنىڭ نارازىلىعى نەگٸزٸندە كاسساتسييالىق سوت اپەللياتسييالىق ينستانتسييانىڭ قاۋلىسىن جويدى. نەتيجەسٸندە ەسەپشٸنٸڭ جازا مەرزٸمٸ 5 جىل 7 ايعا دەيٸن ۇلعايتىلدى.
