بٷگٸن حالىق الدىندا ەسەپ بەرۋ كەزدەسۋٸندە قر دەنساۋلىق ساقتاۋ مينيسترٸ الەكسەي تسوي دەرٸگەرلەر جالاقىسىن كٶتەرۋگە قاتىستى تٷسٸنٸك بەردٸ, دەپ حابارلايدى "ۇلت اقپارات".
«مەديتسينالىق ۇيىمداردى بٸلٸكتٸ كادر رەسۋرستارىمەن جاساقتاۋ ٷشٸن بٸز تيٸستٸ ٸس-شارالاردى قاراستىردىق. بۇل تۇرعىدا مەديتسينا قىزمەتكەرلەرٸن دايارلاۋعا گرانتتار سانىن ۇلعايتۋ, دەرٸگەرلەردٸڭ كەسٸبي جاۋاپكەرشٸلٸگٸن ساقتاندىرۋ جٷيەسٸن ەنگٸزۋ, مەديتسينا قىزمەتكەرلەرٸنٸڭ جالاقىسىن كەزەڭ-كەزەڭٸمەن, ياعني 2023 جىلعا قاراي ەكونوميكاداعى ورتاشا جالاقىدان ەكٸ جارىم ەسە جوعارى دەڭگەيگە دەيٸن كٶتەرۋ ەسكەرٸلگەن», - دەدٸ مينيستر.
ونىڭ ايتۋىنشا, 2021 جىلدىڭ 1 قاڭتارىنان باستاپ 247 مىڭ مەديتسينا قىزمەتكەرٸنٸڭ جالاقىسى, ياعني دەرٸگەرلەرگە 30 پايىزعا, ورتا مەديتسينا قىزمەتكەرلەرٸنە 20 پايىزعا ٶستٸ.
«وسىلايشا, 2023 جىلى دەرٸگەرلەردٸڭ ورتاشا جالاقىسى شامامەن 561 مىڭ تەڭگەنٸ, ورتا مەديتسينالىق قىزمەتكەرلەردٸڭ جالاقىسى 210 مىڭ تەڭگەنٸ قۇرايدى», - دەدٸ تسوي.
