قازاقستاندا Qnet جەلٸلٸك كومپانيياسىنا قاتىستى 29 قىلمىستىق ٸس قارالىپ جاتىر, دەپ حابارلايدى قازاقپارات.
قر ٸٸم تەرگەۋ دەپارتامەنتٸنٸڭ باسشىسى سانجار ەدٸلوۆتٸڭ ايتۋىنشا, Qnet كومپانيياسىنىڭ باس كەڭسەسٸ مالايزييادا ورنالاسقان.
«كومپانييا جەلٸلٸك ماركەتينگ جٷرگٸزەدٸ, وندا ادامدار تٷرلٸ زەرگەرلٸك بۇيىمداردى ساتۋمەن اينالىسادى. باستاپقى سالىم سوماسى – 30 دوللار. قازٸرگٸ ۋاقىتتا ازاماتتاردان 211 شاعىم تٸركەلگەن. جالپى ەلٸمٸز بويىنشا 29 قىلمىستىق ٸس تەرگەلٸپ جاتىر», - دەدٸ س. ەدٸلوۆ قر ٸٸم ۇيىمداستىرعان ونلاين بريفينگتە.
سپيكەردٸڭ ايتۋىنشا, الماتى وبلىسى پوليتسييا دەپارتامەنتٸنٸڭ تەرگەۋ باسقارماسى Qnet كومپانيياسىنىڭ ٶكٸلدەرٸنە قاتىستى 20 قىلمىستىق ٸستٸ تەرگەپ جاتىر.
«مۇندا 220 ادامنىڭ زادراپ شەككەنٸ انىقتالدى. ولار 160 ملن تەڭگە ماتەريالدىق شىعىنعا ۇشىراعان. تەرگەۋ شارالارى بەلسەندٸ جٷرٸپ جاتىر. مالايزييا كورولدٸگٸنە حالىقارالىق تەرگەۋ تاپسىرماسى جٸبەرٸلدٸ. اتالعان قىلمىستىق ٸس نەتيجەلەرٸ تۋرالى قوسىمشا حابارلايمىز», - دەدٸ دەپارتامەنت باسشىسى.
ايتا كەتەيٸك, جىل باسىنان بەرٸ ٸشكٸ ٸستەر ورگاندارى قارجى پيراميدالارىن ۇيىمداستىرۋ مەن قۇرۋ بويىنشا 217 قىلمىستىق ٸستٸ تەرگەپ, 116 ٸستٸ سوتقا جولداعان.
