23 қыр, 2021 сағат 13:59

Сыр елінде этностар арасында «Сөз маржаны» атты мүшәйра өтті

Сыр елі, жыр елі деп танылған Қызылорда облысының Достық үйінде «Сөз маржаны» атты жас ақындар мүшәйрасы өтті, - деп хабарлайды «Ұлт ақпарат».

Қала мен аудандардан келіп 10 өнерпаз қатысқан жыр бәйгесін Қызылорда облыстық ішкі саясат басқармасының «Қоғамдық келісім» КММ, қалалық мәдениет бөлімі және «Бітім» медиация орталығының ұйымдастыруымен өтті.

«Баршаңызды бүгінгі жыр кешімен құттықтаймын. Қандай жағдайда да сөз ең нақты атылған оқ деп білемін. Өйткені дана халқымыз «айтылған сөз атылған оқ» деп бекер айтпаған. Оның ішінде айтыс өнерінің орны ерекше. Бабадан келе жатқан бұл сөз өнері екінің біріне бұйыра бермейтін бақ. Айтыс қазаққа ғана емес, түркі халықтарына ортақ өнер. Қызыл тіл кез келген мәселені шешкен. Бүгін бағын сынағалы отырған жастардың батылдығына шексіз ризамын. Айтыста жұлдыздарыңыз жана берсін», - деген «Қоғамдық келісім» КММ директорының міндетін атқарушы Фархат Әбдібағдатұлы жыр мүшәйрасын ашып, болашағынан үміт күттіретін жас өнерпаздарға сәттілік тіледі.

Сонымен, жастардың бағынн сынаған сайыста жас таланттар мүшәйра ережесіне сай екі кезең бойынша бақ сынады. Қатысушылар ел Тәуелсіздігінің 30 жылдығын, достық пен татулық, ынтымақ пен бірлікті, ана тілдің қадірі мен еңселі елдің еркіндігін өз жырларына арқау етті. Жырлары арқылы үлкен ой көтерген сөз шеберлеріне деген қошеметте зор болды.

«Ақын болу оңай емес. Оның жауапкершілігі де зор. Жазба ақындыққа қарағанда айтыс өнерінің жауапкершілігі ауыр. Өйткені айтыста айтқан сөзіңді жөндей алмайсың. Сөз тергенде қалай айтсаң, солай жазылып, сақталады. Ел алдында абройлы болуың да, абыройсыз болуың да бір-ақ сәт. Сондықтан ауыздан шыққан әрбір сөзге мұқият болу керек. Міне, ақындықтың салмағы осында. Бүгінгі жыр мүшәйрасына қатысып жатқан әрбір жастың талабын таудай екен. Сөз қадірін білетін жастар үшін қуанамыз, әрине. Бұл айтыс өнері сонау бабадан қалған амамант қой. Аманатқа қиянат жасамай, бүгінде домбырасын арқалап, сөзден маржан теріп жүргени жастарға алыс айтқым келеді», - деді Қазақстанның еңбек сіңірген қайраткері Ержан Уайс.

Айта кетейік, аталған жыр мүйшәйрасына Қазақстанның еңбек сіңірген қайраткері Ержан Уайс, ақындар Ғабит Кәдірбай және Ұлықбек Бекұзақұлы мүшәйраға қазылық етіп, жас сөз шеберлерінің өнерін сарапқа салды. Таразылап, нәтижесінде бірінші жүлделі орынды Мейіржан Қартбай, екінші орынды Бексұлтан Санақұл, үшінші орынды Нәзерке Мантай иеленді.

«Мен бала кезімнен айтыс сахнасында шыңдалып келемін. Бүгінгі айтыста да топ жарып, жүлделі бірінші орынды алғаныма шын қуаныштымын. Бұл ата-анам үшін үлкен мақтаныш. Өйткені менің анам да, әкем де сөзге жақын адамдар. Олардың арманының жалғасы болып мен өсіп келемін. Осылайша бүгінде облыста жүлделерді бермей шыңдалып келе жатырмын. Бұйырса, алдағы уақытта республикаға белгілі сөз мергені болатыныма сенімдімін. Оған менің ерік-жігерім жетеді деп ойлаймын. Бүгінгі айтыс оңай болған жоқ, қарсыластарым да мықты болды. Сондықтан барлық қатысушылар мен ұйымдастырушыларға рақмет айтамын», - деді бірінші жүлделі орынды иеленген Мейіржан Қартбай.

Барлық қатысушыларға «Қоғамдық келісім» КММ директорының міндетін атқарушы Фархат Әбдібағдатұлы атынан Алғыс хат берілді. Ал жеңімпаздарға диплом мен сыйлықтар табысталды.

Естеріңізге сала кетейік, Сыр елі, жыр елі деп танылған Қызылорда облысының Достық үйінде «Сөз маржаны» атты жас ақындар мүшәйрасы өтті. Қала мен аудандардан келіп 10 өнерпаз қатысқан жыр бәйгесін Қызылорда облыстық ішкі саясат басқармасының «Қоғамдық келісім» КММ, қалалық мәдениет бөлімі және «Бітім» медиация орталығының ұйымдастыруымен өтті. Аталған жыр мүйшәйрасына Қазақстанның еңбек сіңірген қайраткері Ержан Уайс, ақындар Ғабит Кәдірбай және Ұлықбек Бекұзақұлы мүшәйраға қазылық етіп, жас сөз шеберлерінің өнерін сарапқа салды. Таразылап, нәтижесінде бірінші жүлделі орынды Мейіржан Қартбай, екінші орынды Бексұлтан Санақұл, үшінші орынды Нәзерке Мантай иеленді.