14 мау, 2022 сағат 15:42

Қазақстанда электросамокат жылдамдығы шектелуі мүмкін

Қазақстанда электр самокат үшін ұлттық стандарт әзірленіп жатыр. Қазір электросамокаттар үшін техникалық талаптар талқылануда. Бұл туралы Қазақстан стандарттау және метрология институтының комитет төрағасы Ербол Сейпілов айтты, деп хабарлайды Sputnik Қазақстан.

"Бұл велосипед деп санайтын адамдар мен оны мопед немесе мотоцикл деп санайтындар арасында қызу пікірталас болды. Бірінші кезекте, осы стандартты әзірлеу үкіметтің тапсырмасы бойынша ішкі істер министрлігінің бастамасымен жүргізілгенін атап өткен жөн. Осы стандарт аясында біз самокаттың 25 км/сағ дейінгі максималды жылдамдығын, сондай-ақ жаяу жүргіншілер режимінің мүмкіндігін қарастырдық", - деді ол құжатты талқылау бойынша кездесу барысында.

Ұлттық стандартқа сәйкес электросамокат - бұл "орындығы жоқ, электр қозғалтқышын пайдалану арқылы бір адамның қозғалуына арналған екі немесе үш дөңгелегі бар жеке мобильділік" электр көлігі. Стандартты әзірлеушілер электр самокаттарының барлық түрі үшін максималды жылдамдықты енгізуді ұсынады - сағатына 25 шақырымнан аспайды.

Жылдамдықты шектеу себептерінің бірі - Қазақстанда самокатшылардың қатысуымен апат жиі болады.

Ішкі істер министрлігі мәліметінше, 2021 жылы Қазақстанда самокаттардың қатысуымен 68 апат болып, бір адам көз жұмған. 71 адам зардап шекті. Биыл самокатшылардың қатысуымен 41 апат болды..

Егер ережелер қабылданып, заңнамаға тиісті түзетулер енгізілсе, электр скутер өндірушілері көлікке арналған нұсқаулықта жүргізушінің салмағы, жасы, бойы бойынша нормаларды қарастыруға тиіс. Самокаттың өзінде таңбалау, жарық шағылыстырғыш, фаралар болуы керек.

Жіктеу бойынша электросамокаттарды велосипедтерге жатқызу қарастырылып жатыр. Олар жол бойымен де, тротуармен де жүре алады. Жаяу жүргіншілерге жақындаған кезде жылдамдықты төмендету қажет болады.

"Бұл стандарт заңнамадағы нормативтік құжаттарда, жол қозғалысы ережелерінде осы мәселені реттеу үшін әзірленуде. Толық жағдайды біз стандарттың өзін пысықтағаннан кейін көреміз және заңнамаға тиісті өзгерістер енгізілетін болады", - деп толықтырды Ербол Сейпілов.

Стандарттарды биыл қыркүйекке дейін енгізу жоспарланып отыр.