Ғарыштық спутниктердің көмегімен атмосфераны бақылайтын канадалық GHGSat компаниясы бір шахтадан алынған метанның ең үлкен шығарылымы туралы хабарлады. Бұл - Ресейдің Кемерово облысындағы Распадская көмір шахтасы, деп хабарлайды ҚазАқпарат ресейлік ВВС-ге сілтеме жасап.
Компания рекордтық шығарылым 14 қаңтарда болғанын және шахта сағатына 90 тоннаға жуық метанды атмосфераға шығарғанын мәлімдеді. Шығарындылардың жалпы көлемі жүздеген мың тұрғын үйлерді жылытуға жететін еді, бірақ оның орнына жүздеген тонна метан ауаға ұшып кеткен. Парниктік эффект тұрғысынан бұл газ (оның химиялық формуласы CH4) көмірқышқыл газынан 30 есе қауіпті, өйткені ол атмосферада әлдеқайда көп жылуды ұстап, планетаны жылытады.
Ғалымдардың пайымдауынша, метан дүниежүзіндегі орташа жылдық температурадан асатын жағдайлардың үштен біріне, кейде жартысына (30-50%) жауапты.
Штаб-пәтері Монреальда орналасқан GHGSat компаниясы жер атмосферасының құрамы туралы деректерді бес орбиталық спутниктен алады. Бесеуі де бүгінгі күні ғарыштағы метанды анықтаудың ең озық сенсорларымен жабдықталған. Компанияның міндеті – метанның антропогендік көздерін анықтау және мүмкіндігінше оның шығарындыларын барынша азайту. Компания клиенттерінің көпшілігі қазба отындарын өндірумен айналысады.
Распадская кенішінде кокстелетін көмір өндіріледі, бұл Ресейдегі ең ірі көмір кеніші - жалпы ұзындығы шамамен 350 км болатын жерасты туннельдерінің үлкен кешені. 2010 жылы ресейлік көмір өнеркәсібі тарихындағы ең үлкен трагедиялардың бірі сол жерде болған, Распадскаяда бірнеше жарылыс болып, 90-ға жуық адам қаза тапты.
622 рет оқылды_140_110.webp)
