Qazaqstanda elektrsamokattar men basqa da jeke mobildilik quraldaryn paidalanýǵa qatysty jańa talaptar kúshine endi. 2026 jylǵy 25 tamyzdan bastap elektrsamokattardyń trotýarlar men jaiaý júrginshiler joldarymen júrýine tyiym salynady. Bul týraly Bas prokýratýra eskertti, dep habarlaidy ult.kz.
Vedomstvonyń málimetinshe, jyl basynan beri moped júrgizýshileriniń kinásinen 390 jol-kólik oqiǵasy tirkelgen. Saldarynan 33 adam qaza taýyp, 461 adam jaraqat alǵan.
Sonymen qatar velosipedshilerdiń kinásinen – 169, shaǵyn elektr kólik quraldaryn basqarýshylardyń kinásinen – 97, al elektrsamokat júrgizýshileriniń kinásinen 47 jol-kólik oqiǵasy bolǵan.
Osy oqiǵalardyń saldarynan 329 kámeletke tolmaǵan bala zardap shegip, 10 bala qaza tapqan.
Elektrosamokat pen basqa da eki dóńgelekti kólik quraldaryn paidalanýshylardyń ózderi de jol apattarynan zardap shegýde. Jyl basynan beri elektrsamokat júrgizýshilerin kólik qaǵyp ketken 145 jaǵdai, moped júrgizýshilerin qaǵyp ketken – 82, shaǵyn elektr kólik quraldaryn basqarýshylardy qaǵyp ketken 52 jaǵdai tirkelgen. Nátijesinde tórt adam qaza taýyp, 300-ge jýyq adam jaraqat alǵan.
Elektrosamokat júrgizýshilerine qandai talap qoiyldy?
Endi elektrsamokatpen:
- trotýarlar men jaiaý júrginshiler joldarynda júrýge bolmaidy;
- velosiped joly nemese velosiped jolaǵy bolsa, qozǵalys tek solar arqyly júzege asyrylady;
- olar bolmaǵan jaǵdaida joldyń oń jaq shetimen nemese jol jiegimen júrýge ruqsat etiledi.
Al elektrsamokatpen júris bóliginde tek 18 jasqa tolǵan, tiisti sanattaǵy júrgizýshi kýáligi bar jáne qorǵanysh dýlyǵasyn paidalanatyn adamdar ǵana qozǵala alady.
Moped júrgizýshileri joldyń júris bóligimen qozǵalýǵa mindetti. Al samokat, velosiped jáne mopedpen joldy jaiaý júrginshiler ótkeli arqyly kesip ótken kezde júrgizýshiler kólikten túsip, ony qasynan jetektep ótýi kerek.
Sondai-aq jolaýshylardy tasymaldaýǵa, róldi ustamai telefon paidalanýǵa jáne qarańǵy ýaqytta jaryq shaǵylystyratyn elementtersiz júrýge tyiym salynady.
Bas prokýratýra adamdar kóp júretin jerlerde joǵary jyldamdyqpen júrýdiń asa qaýipti ekenin eske saldy. Ásirese balalar, qarttar jáne balalar arbasymen júrgen ata-analar qaýipke jii ushyraidy.
Vedomstvo ata-analardy balalarǵa jol qozǵalysy erejelerin úiretip, samokat pen velosipedti paidalanýyn baqylaýǵa shaqyrdy.
Bas prokýratýranyń málimdeýinshe, samokat, velosiped nemese moped adamdy joldaǵy qaýipten qorǵamaidy. Sondyqtan joldaǵy qaýipsizdik árbir qozǵalys qatysýshysynyń jaýapkershiliginen bastalady.
