2026 jyldyń alǵashqy jartyjyldyǵynda respýblikadaǵy kontsert uiymdary 2966 mádeni is-shara ótkizip, olardy 1 752 940 adam tamashalady. Kontsertter, gastrolder men shyǵarmashylyq jobalar elimizdiń iri qalalarymen qatar, ózge óńirlerinde de uiymdastyryldy, dep habarlaidy ult.kz.
Búginde elimizde 35 kontsert uiymy jumys isteidi, onyń 7-eýi respýblikalyq deńgeide qyzmet etedi. Mádeni uiymdar ulttyq ónerdi nasihattap, shyǵarmashyl ujymdardy el arasynda keńinen tanytyp keledi.
Alǵashqy jartyjyldyqtaǵy aýqymdy mádeni jobalardyń biri – «Halyq áýeni» kontserttik-gastroldik týry. 21-23 mamyr aralyǵynda ótken joba elimizdiń 17 óńirin qamtydy. Úsh kún ishinde shalǵai aýdandar men aýyldyq eldi mekenderde 51 kontsert uiymdastyrylyp, olardy 20 myńǵa jýyq adam tamashalady.
Joba aiasynda halyq ánderi, simfoniialyq mýzyka, zamanaýi estrada, miýzikl jáne horeografiialyq qoiylymdar kópshilikke usynyldy. Kórermenge respýblikalyq jetekshi shyǵarmashylyq ujymdar, «Qazaqkontserttiń» ónerpazdary, orkestrler, bi ansamblderi, opera solisteri men dástúrli óner ókilderi óz shyǵarmashylyǵyn pash etti.
Joba tek kontserttik baǵdarlamamen shektelmei, shyǵarmashylyq júzdesýlermen de jalǵasyn tapty. Óńirlerde uiymdastyrylǵan 8 kezdesý men sheberlik sabaǵynda kópshilik tanymal óner ielerimen júzdesip, olardyń shyǵarmashylyǵymen tanysty. Jas ónerpazdar úshin bul kezdesýler tájiribe almasyp, sheberligin shyńdaityn taǵylymdy alańǵa ainaldy.
Alǵashqy jartyjyldyqta el ishindegi gastrol aiasynda 39 kontsert uiymdastyryldy. Olardy 17 012 kórermen tamashalady. Kontsertter Astana, Almaty qalalarynda, sondai-aq Pavlodar, Aqtóbe, Mańǵystaý, Qostanai, Aqmola, Almaty, Qyzylorda, Abai jáne Jetisý oblystarynda ótti.
Jyl basynan beri kontsert uiymdary kórermenge mereitoilyq keshterden bastap, folklorlyq, akademiialyq jáne zamanaýi baǵyttaǵy san alýan shyǵarmashylyq jobalardy usyndy. Olardyń qatarynda «FLOW/AǴYN», «Ómir – qazyna», «Otan ana», «Adam daýysy» monooperasy, jasandy intellekt tehnologiiasy qoldanylǵan «Áýenge ainalǵan sezim» kontserti jáne Qurmanǵazy atyndaǵy Qazaq ulttyq halyq aspaptar orkestriniń FOLK SHOW NAURYZ sekildi jańa jobalary bar.
