Qazaqstanda jol qurylysy jumystarynyń sapasyn tekserý barysynda 1 670 aqaý men zańbuzýshylyq anyqtaldy. Mindetin tiisinshe atqarmaǵan tehnikalyq qadaǵalaý mamandaryna jalpy somasy 53,4 mln teńge aiyppul salynyp, 22 sarapshy jumystan shyǵaryldy, dep habarlaidy Ult.kz.
2026 jyldyń basynan beri "QazAvtoJol" ulttyq kompaniiasynyń mamandary jol qurylysy júrgizilip jatqan nysandarda 50-ge jýyq tekserý ótkizgen.
Tekserý barysynda jol jamylǵysyndaǵy shuńqyrlar men jaryqtar, asfalt qabatynyń oiylýy jáne yǵysýy, kólik iziniń paida bolýy sekildi joldyń sapasy men qaýipsizdigine áser etetin 1 670 kemshilik tirkeldi.
Qazirgi ýaqytta onyń 831-i, iaǵni 49,8 paiyzy túzetilgen. Qalǵan aqaýlardy joiý jumystary jalǵasyp jatyr.
Árbir derek boiynsha jaýapty tulǵalar anyqtalyp, tiisti sharalar qabyldanýda. Jol jumystarynyń sapasyn durys qadaǵalamaǵan mamandarǵa 53,4 mln teńge kóleminde aiyppul salyndy. Sonymen qatar tehnikalyq qadaǵalaý qyzmetiniń 22 sarapshysy jumystan bosatyldy.
"QazAvtoJol" ókilderiniń málimdeýinshe, aqaýdyń anyqtalýy jumystyń qabyldanǵanyn bildirmeidi. Merdiger kompaniialarǵa barlyq kemshilikti joiý jóninde talap qoiylyp, jaýapty tulǵalarǵa zańda qarastyrylǵan sharalar qoldanylady.
Jol qurylysynyń sapasyn tekserý jumystary respýblikalyq mańyzy bar avtojoldardyń búkil jelisi boiynsha jalǵasady.
