«Qazaqstan Respýblikasynyń keibir zańnamalyq aktilerine jyljymaityn múlikke quqyqtardy jáne zańdy tulǵalardy memlekettik tirkeý máseleleri boiynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaidy QazAqparat.
Bul zań jobasy Parlamenttiń bir top depýtattarymen ázirlendi.
«Jyljymaityn múlikke quqyqtardy tirkeý salasyndaǵy vedomstvoaralyq úilestirýdiń tiimdiligin arttyrý eskerilgen.
Quqyqtyq kadastrdyń aqparattyq júiesi men ýákiletti organdar men uiymdardyń aqparattyq júieleriniń integratsiialyq ózara is-qimyly arqyly quqyqtyq kadastrdan aqparat alýǵa baǵyttalǵan normalar kózdelgen. Sonymen qatar, jyljymaityn múlikke quqyqtardy tirkeýdiń qoldanystaǵy rásimderin ońtailandyrý jáne memlekettik qyzmetter kórsetý protsesteriniń satylaryn jetildirý qarastyrylǵan. Elektrondyq tirkeý keńeitiledi. Múddeli organdarǵa jyljymaityn múlikke quqyqtardy memlekettik tirkeý úshin quqyq belgileitin qujattardyń elektrondyq kóshirmelerin jiberý múmkindigi beriledi», - dedi Májilis depýtaty Qanat Mýsin.
Osy oraida ol notariýstarda bul salada oń tájiribe bar ekenin jetkizdi. 2012 jyldan bastap «Biryńǵai notariattyq aqparattyq júie» «Jyljymaityn múlik tirkelimi» derekqorymen biriktirildi.
«Mámile jasalǵannan keiin quqyq belgileitin qujattardyń kóshirmeleri memlekettik tirkeý úshin elektrondyq túrde jiberiledi. Múlikti satyp alýshy nátijeni 1 jumys kúni ishinde alady. Nur-Sultan jáne Shymkent qalalarynda ekinshi deńgeidegi bankterdiń kepilin elektrondyq tirkeý boiynsha pilottyq joba iske asyryldy. Pilottyq jobaǵa «Forte Bank» AQ qatysady. Jergilikti atqarýshy organdar múlikti jekeshelendirý sharttaryn elektrondyq tirkeý úshin «Jyljymaityn múlik tirkelimi» derekqorymen integratsiialaýǵa daiyndyǵyn bildirdi», - dedi depýtat.
Onyń aitýynsha,qazirgi kezde menshik iesi óz jyljymaityn obektisin nemese qurylysyn buzǵan jaǵdaida, onyń menshik quqyǵyn toqtatý máselesi zańda rettelmegen. Óitkeni búgingi kúni eshbir memlekettik organ obektini buzý faktisin rastamaidy.
«Bul másele boiynsha azamattardyń kóptegen aryz-shaǵymdary týyndap, olar sotqa júginýge májbúr bolady. Osyǵan bailanysty, zań jobasynda obektini buzýdy rastaityn qajetti qujattardy rásimdeý tártibin aiqyndaityn norma kózdelgen. Bul normaǵa sáikes obektini buzý faktisin rastaý ókilettigin, sáýlet jáne qala qurylysy salasyndaǵy organdarǵa júkteledi. Sondai-aq, zań jobasynda ákimshilik kodeksten jyljymaityn múlikke quqyqtardy tirkeý merzimin buzǵany úshin jaýaptylyq alyp tastalady. Sebebi Zańnan jyljymaityn múlikti memlekettik tirkeý úshin alty ailyq merzimin joiý usynylady. Bul qajettilik ózimen-ózi joiyldy, óitkeni menshik quqyǵyn tirkeý boiynsha qyzmetterdiń kópshiligi, sonyń ishinde aýyrtpalyqtar salý boiynsha qyzmetter elektrondyq formatqa aýystyrylady», - dedi Qanat Mýsin.
