QR Premer-Ministriniń tóraǵalyǵymen ótken Úkimet otyrysynda energetika ministri Q. Bozymbaev pen investitsiialar jáne damý ministri J. Qasymbek jylytý maýsymyna daiyndyq barysy týraly baiandady, dep habarlaidy "Ult aqparat" primeminister.kz saityna silteme jasap.
Energetika ministrliginiń derekterine sáikes, jalpy energiia kásiporyndarynyń kúzgi-qysqy kezeńge daiyndyǵy uiymdastyrylǵan túrde, kestege sáikes ótýde.
«2018/19 jyldardaǵy jylytý kezeńin turaqty ótkizý úshin Investitsiialar jáne damý ministrligimen birlesken buiryqpen jylytý maýsymyna daiyndyq, ótkizý, elektr stantsiialary men kommýnaldyq–turmystyq sektorlardy jáne halyqty kómirmen qamtamasyz etýge monitoring jasaý jónindegi shtab quryldy. Shtab quramyna ministrlikterdiń jáne ákimdikterdiń jaýapty qyzmetkerleri kirdi. Ótken aptada oblystarmen selektorlyq keńes ótkizilip, tiisti máseleler qaraldy», — dedi ministr Q. Bozymbaev.
Q. Bozymbaevtyń aitýynsha, búginde 4 energobloktyń jóndeý jumystary aiaqtaldy. Bul jyldyq kólemniń 50% quraidy. Sonymen qatar, 20 qazandyq jóndeldi. Bul jyldyq kólemniń 36% quraidy. Sondai-aq, 20 týrbina nemese jyldyq kólemniń 44% qaita jóndeýden ótti. Qazirgi tańda ár túrli deńgede 4 energoblokta, 31 qazanda jáne 25 týrbinada jóndeý jumystary júrgizilýde.
21 myń km elektr jelileri jóndelgen, bul jyldyq jospardyń 75% jáne 497 qosalqy stantsiialar jóndeldi, bul jyldyq jospardyń 77% quraidy. Ortalyqtandyrylǵan jylýmen jabdyqtaý aimaǵyndaǵy 568 qazandyqtyń 413-shi jóndelgen.
Sonymen qatar, elektr stantsiialarynda 2,8 mln tonna kómir jáne 81 myń tonna mazýt qory ázirlendi.
«Ortalyqtandyrylǵan jylýmen qamtamasyz etý aimaǵyndaǵy qazandyqtarda 979 myń tonna kómir jinaqtalǵan, nemese jospardyń 66% jáne 32 myń tonna mazýt jinaqtalǵan, bul jospardyń 22% quraidy», — dedi Q. Bozymbaev.
Sondai-aq, energetika ministri qysqy maksimaldy júkteme 14 800 MVt kóleminde bolady dep kútiletinin aitty. Bul ótken jylmen salystyrǵanda 185 MVt-qa joǵary.
Óz kezeginde investitsiialar jáne damý ministri J. Qasymbek osy jyldyń 7 aiynda 60 mln tonna kómir óndirilgenin, bul ótken jyldyń sáikes kezeńimen salystyrǵanda 103,9%-dy quraitynyn nemese 2,3 mln tonnaǵa artyq ekenin jetkizdi.
QR IDM derekteri boiynsha, qurylǵan Shtab aiasynda kúndelikti kúzgi-qysqy kezeńniń daiyndyǵy men ótýine, elimizdiń elektr stantsiialaryndaǵy normativtik otyn qoryn jinaýǵa monitoring júrgiziledi.
«2018–2019 jyldar kezeńinde turǵyndarǵa, kommýnaldyq-turmystyq kásiporyndarǵa jáne biýdjettik uiymdarǵa respýblika boiynsha kómir jetkizýdiń jalpy suranysy 9,8 mln tonnany quraidy, onyń 2,3 mln tonnasy kommýnaldyq-turmystyq kásiporyndar men biýdjettik uiymdarǵa, al 7,5 mln tonnasy turǵyndardyń tutynýyna josparlanǵan», — dedi J. Qasymbek.
Biyl jylý berý maýsymyna daiyndyq bastalǵaly (1 mamyrdan 16 tamyzǵa deiin) temir jol kóligimen 18 621,2 myń tonna kómir tasymaldandy. Bul 2017 jyldyń sáikes kezeńimen salystyrǵanda 753,9 myń tonnaǵa (4,2%-ǵa) artyq.
«Tasymaldanǵan 18,6 mln tonna kómirdiń 2,8 mln tonnasy – kommýnaldyq-turmystyq qajettilikke tiesili. Ol 2017 jyldyń sáikes kezeńimen salystyrǵanda 600 myń tonnaǵa artyq. Jalpy respýblikaishilik qatynasta kómir tieý 91% oryndaldy. Qazirgi tańda tasymaldaýǵa QTJ parkiniń shamamen 9 myń vagony jumyldyrylǵan. Tasymaldaý kólemi ulǵaiǵan jaǵdaida basqa temirjol ákimshilikterinen 1000 vagon tartylatyn bolady», — dep J. Qasymbek, QR IDM «QTJ» UK» AQ-men birlese otyryp, ishki bailanysty kómir tieýmen qamtamasyz etý boiynsha jumys júrgizip jatqatyn aitty.
Budan ózge, turǵyn úi–kommýnaldyq sharýashylyq nysandaryn aldaǵy jylý berý maýsymyna daiyndaý aiasynda 2018-2019 jyldarǵa arnalǵan jumys jospary bekitildi. Josparǵa sáikes oblystardyń, Astana men Almaty qalalarynyń ákimdikterine 1 qyrkúiekke qarai bilim berý nysandarynyń 100% daiyndyǵyn qamtamasyz etý, 15 qazanǵa deiin barlyq nysandardyń daiyndyǵyn aiaqtaý, onyń ishinde, avtonomdyq qazandyq jáne injenerlik jeliler, sonymen qatar, barlyq avtonomdyq jylytý kózderin otynnyń normativtik qorymen qamtamasyz etý qajet.
«Qazirgi tańda jergilikti atqarýshy organdardyń derekteri boiynsha 10 232 bilim berý nysany nemese jospardyń 94%-y daiyn. 6 298 densaýlyq saqtaý nysanyn daiyndaý josparlanǵan bolatyn. Qazir 5 971 nysan nemese 95% daiyn. Jóndeýge josparlanǵan 45 503 turǵyn úidiń 35 551 nemese 79% jóndeldi», — dedi J. Qasymbek.
Ákimdikter 10 558 avtonomdyq qazandyqty jóndeýdi josparlaǵan bolatyn. Qazirgi ýaqytta 9 521 (91%) qazandyq daiyn. Josparlanǵan 5 661,8 km sýmen jabdyqtaý jelileriniń 4 394,5 km nemese 78 % jóndeldi.
Avtonomdy qazandyqtarǵa aldaǵy jylý berý maýsymyna otynnyń qajettiligi — 1 852 myń tonna kómir jáne 168 myń tonna mazýt.
«Jalpy jylý berý maýsymyna daiyndyq bekitilgen josparǵa sáikes júrgizilýde jáne turaqty baqylaýǵa alynǵan. Jylý berý maýsymynyń bastalýyna barlyq turǵyn úi-kommýnaldyq sharýashylyq jáne áleýmettik sala nysandarynyń daiyndyǵyn aiaqtaý kerek. Sonymen qatar, avtonomdyq qazandyqtardy qajetti otyn qorymen qamtamasyz ete otyryp, oblystardyń jáne Astana, Almaty qalalarynyń ákimdikterine jylý berý maýsymyna daiyndyq máselelerin turaqty baqylaýda ustaý qajet», — dedi J. Qasymbek.
Óńirlerdegi jylytý maýsymyna daiyndyq týraly Aqmola oblysynyń ákimi M. Myrzalin, Aqtóbe oblysynyń ákimi B. Saparbaev, Qostanai oblysynyń ákimi A. Muhambetov, Pavlodar oblysynyń ákimi B. Baqaýov, Soltústik Qazaqstan oblysynyń ákimi Q. Aqsaqalov, Astana ákimi Á. Isekeshev, sondai-aq Shyǵys Qazaqstan oblysy ákiminiń orynbasary E. Aimuqashev, Qaraǵandy oblysy ákiminiń orynbasary A. Aidarov baiandady.
Máseleni qaraý qorytyndysy boiynsha Premer-Ministr Baqytjan Saǵyntaev jylytý maýsymyna daiyndyq jumystary jalpy júrgizilip jatqanyn, alaida jumys qarqynyn kúsheitý qajettigin aitty.
«Ákimderge áleýmettik sala obektileri men turǵyn úilerdi jylýmen, energiiamen ýaqytyly jáne sapaly qamtamasyz etýge sizderdiń jaýapty ekenderińizdi esterińizge salamyn. Tutynýshylardy, ásirese, halyqty kómirmen qamtamasyz etýge erekshe nazar aýdarý qajet», — dedi B. Saǵyntaev.
Úkimet ishki naryqty kómirmen úzdiksiz jabdyqtaý úshin barlyq qajetti sharalardy qabyldady. Sondai-aq, vagon tapshylyǵy boiynsha máseleler sheshildi, búgingi kúni kómirdi jóneltýge qatysty problemalar joq.
«Halyqty sapaly kómirmen qajetti kólemde ýaqytyly qamtamasyz etý jáne oǵan baǵa belgileýge óńirlerdiń ákimderi tikelei jaýapty. Kómirdiń ishki naryǵynda ótken jylǵydai jaǵdaiǵa jol bermeý úshin óńirler ákimderi eki apta merzimde kómirdi daiarlaý jáne satý pýnktteriniń jai-kúiine, kómirdi jetkizý kestelerine, kómir baǵasynyń negizdiligi men sapasyna tekserý júrgizýi kerek. Qajet bolǵan jaǵdaida bul jumysqa ortalyq memlekettik organdardyń tiisti aýmaqtyq bólimsheleri men "Atameken" UKP ókilderin qatystyrý qajet», — dep túiindedi B. Saǵyntaev.
Baqylaý jumystary QR Premer-Ministriniń birinshi orynbasary Asqar Maminge júkteldi.
