Elimizde jyl saiyn 1 myńǵa jýyq ata-ana óz quqyqtarynan aiyrylady, odan bólek 40 myń ata-ana men zańdy ókil balalar quqyǵyn buzǵany úshin ákimshilik jazaǵa tartylady. QR Ishki ister ministriniń birinshi orynbasary Marat Qojaev OKQ-de ótken baspasóz máslihatynda málim etti, dep habarlaidy "Ult aqparat".
«Jyl saiyn 40-tan astam ata-ana men zańdy ókilder kámelet jasyna tolmaǵan balalardyń quqyǵy men zańdy múddesin buzǵany úshin ákimshilik jazaǵa tartylady. Sol sekildi sot arqyly jyl saiyn 1 myńǵa jýyq adam ata-analyq quqyǵynan aiyrylady. Búgingi tańdaǵy balalar quqyǵyna qatysty basty problema – olarǵa qarsy zorlyq-zombylyq pen kúsh qoldanýdyń toqtamaýy. Osy jyldyń 8 aiynda kámelet jasyna tolmaǵan jasóspirimderge qatysty 589 qylmystyq is tirkeldi», - dedi Marat Qojaev.
Sondai-aq, vitse-ministr balalarǵa zorlyq kórsetýge qatysty qylmystyq jaýapkershilikti qataitý baǵytyndaǵy zań jobasyn ázirleý qolǵa alynǵanyn aitty.
«Qazirgi ýaqytta balalarǵa zorlyq-zombylyq kórsetken 1,5 myń adam túzeý mekemelerinde óz jazasyn ótep jatyr. Sonymen qatar, bala quqyǵyna qatysty taǵy bir másele - olardyń qaraýsyz qalýynan nemese bos ýaqytynyń kóp bolýynan túrli baǵyttaǵy oqys oqiǵaǵa tap bolýy. Biyl 286 bala ajal qushty. Onyń 16-sy - órt saldarynan, 124-i sýǵa ketip qaitys boldy jáne 146 bala jol-kólik apatynan mert boldy», - dedi ol óz sózinde.
Aita keteiik, buǵan deiin M. Qojaev elordada óz balasyn uryp óltirgen áielge qatysty sotaldy tergeý júrip jatqanyn málim etti. Odan bólek, ministrdiń orynbasary balalarǵa zorlyq-zombylyqty kóbinde kim jasaitynyn aitqan bolatyn.
