Qyrkúiek aiynda Ulttyq bank Úkimetpen birlesip Infliatsiiaǵa qarsy den qoiý sharalaryn qabyldady. Onyń nátijesi týraly QR Ulttyq bankiniń tóraǵasy Erbolat Dosaev aityp berdi, dep habarlaidy QazAqparat.
«Syrtqy teris infliatsiialyq fon jekelegen taýar naryqtaryndaǵy ishki disbalanstarmen jáne ekonomikanyń qalpyna kelýine qarai kiristerdiń ósýimen birge kúrdelene túsedi, olardy retteý úshin qyrkúiekte Úkimetpen birlesip qabyldanǵan Infliatsiiaǵa qarsy den qoiý sharalary aiasynda shuǵyl qadamdar qabyldanýda. Birlesken kúsh-jiger arqasynda alǵashqy nátijege jete bastadyq, atap aitqanda, azyq-túlik baǵasy 11,5%-ten 11,3%-ke deiin baiaýlap, jyldyq infliatsiia sońǵy 6 aida alǵash ret ósýdi toqtatty», - dedi Ulttyq bank tóraǵasy Qazaqstan qarjygerleriniń IX kongresinde.
Onyń aitýynsha, qazan aiynda jyldyq infliatsiia qarqyndaǵan óńirler sany 13-ten 7-ge deiin tómendedi.
«Jalpy alǵanda, Qazaqstan ekonomikasynda áli de turaqty joǵary infliatsiialyq fon saqtalýda. Azyq-túlik taýarlary baǵasynyń aitarlyqtai ósýin qazanda 10,3%-ke jetken halyqtyń joǵary infliatsiialyq boljamdar qoldap otyr. Jaz ailarynda infliatsiianyń aitarlyqtai óskenin eskersek, biylǵy shildeden bastap Ulttyq Bank bazalyq stavkany 9%-ten 9,75%-ke deiin 75 bazistik tarmaqqa úsh ret kóterip, dezinfliatsiialyq aqsha-kredit saiasatyn júrgize bastady.
Bizdiń pikirimizshe, Infliatsiiaǵa qarsy den qoiý sharalary aiasynda taýar naryqtaryndaǵy teńgerimsizdikti joiý úshin júieli jáne aldyn alý sharalaryn qabyldaý 2022 jyldyń ekinshi jartysynda infliatsiiany 4-6% nysanaly dálizdiń joǵarǵy sheginde ustaýǵa múmkindik beredi. Syrtqy infliatsiialyq qysymnyń álsireýi, azyq-túliktiń álemdik baǵasynyń birtindep tómendeýi jáne álemdegi jetkizý qatarynyń qalpyna kelýi aiasynda infliatsiia baiaýlaidy dep kútemiz», - dedi Dosaev.
