Jyl sońyna deiin elimizde stýdentterge arnalǵan 23 jataqhana paidalanýǵa beriledi. Bul jaiynda Májilis depýtattarynyń saýalyna QR Premer-Ministriniń orynbasary Eraly Toǵjanovtyń jaýabynda aitylǵan, dep habarlaidy QazAqparat.
«Elbasynyń Úshinshi áleýmettik bastamasy aiasynda 2020 jyly 20 myń tósek-orynǵa arnalǵan 75 nysan paidalanýǵa berildi. Sonymen qatar, biyl jyl basynan bastap 3 myń tósek-orynǵa arnalǵan 15 jataqhana paidalanýǵa berilgen edi», - dep atap ótedi Úkimet basshysynyń orynbasary jaýabynda.
Onyń málimetinshe, 2021 jyldyń sońyna deiin jasalǵan aldyn ala sharttar esebinen 5,5 myń tósek-orynǵa arnalǵan 23 jataqhanany paidalanýǵa berý josparlanǵan.
«Budan basqa, segiz oqý orny turǵyn úi-jailardy jalǵa alý esebinen 2 myńǵa jýyq tósek-orynǵa qajettilikti qamtamasyz etip otyr. Al, 2022 jyly 24 myńǵa jýyq oryndyq 59 jataqhanany, 2023 jyly 11,5 myń oryndyq 25 jataqhanany paidalanýǵa berý josparlanýda», - dedi Eraly Toǵjanov.
