2020-2023 jyldar aralyǵynda 40 myń otbasyna nemese jyl saiyn 10 myń otbasyna qoldaý kórsetý josparlanǵan. Bul týraly QR Indýstriia jáne infraqurylymdyq damý ministrliginiń keńeitilgen alqa májilisinde aityldy, dep habarlaidy QazAqparat.
«Az qamtylǵan otbasylardy turǵyn úimen qamtamasyz etýdiń pármendi sharalarynyń biri - «Baqytty otbasy» baǵdarlamasy. Qujat ótken jyly iske qosylǵan bolatyn jáne múgedek balasy bar, kópbalaly, tolyq emes otbasy sanalatyn 5 myńnan astam azamattyń turǵyn úi jaǵdaiyn jaqsartýǵa múmkindik berdi», - deidi QR Indýstriia jáne infraqurylymdyq damý birinshi vitse-ministri Qaiyrbek Óskenbaev.
Onyń aitýynsha, az qamtylǵan otbasylardyń baǵdarlamaǵa qol jetkizýi úshin bastapqy jarnany jabý úshin turǵyn úi sertifikattary beriledi.
«2020-2023 jyldary 40 myń otbasyna nemese jyl saiyn 10 myń otbasyna qoldaý kórsetý josparlanǵan. Memlekettik qarajatty tiimdi paidalaný úshin 2019 jyly «Kezektegilerdiń biryńǵai respýblikalyq bazasy» servistik baǵdarlamalyq ónimi ónerkásiptik paidalanýǵa berildi. Osy baǵdarlama memlekettik organdardyń derekter bazasymen integratsiialanǵan jáne turǵyn úige muqtaj azamattardy kezekke qoiýdyń ashyqtyǵyn qamtamasyz etedi», - deidi ol.
