Almaty qalasy qutqarý qyzmetiniń ókilderi taýly aimaqtaǵy qaýipsizdik sharalary týraly aitty, dep habarlaidy "Ult aqparat".
«Almaty qalasynyń qutqarý qyzmeti» memlekettik kommýnaldyq kásiporny direktorynyń orynbasary Erjan Qańlybaevtyń aitýynsha, adam taýǵa shyǵar aldynda aýa raiyna nazar aýdarýy kerek.
«Taýǵa bet alǵan kez kelgen adam, eń aldymen aýa raiyna mán berýi qajet. Sonymen qatar, týystary men jaqyndaryna qaida bara jatqanyn aitýy shart. Iaǵni, olar bilýi tiis. Jalpy aqparat bolýy kerek. Taǵy bir aita ketetin jáit, árdaiym ózińizben birge 100 paiyz qýattalǵan uialy telefondy alyp júrińiz. Qys mezgilinde 2-3 telefon bolǵany abzal. Sondai-aq, taýly aimaqtarda tyiym salynǵan jerlerge barmaǵan jón. Sozylmaly aýrýlary bar adamdarǵa jaiaý serýendeýden bas tartqan durys nemese qolaily sátti tańdaǵan jón», - dedi Erjan Qańlybaev.
Respýblikalyq jedel-qutqarý jasaǵy qutqarý bóliminiń basshysy Sergei Tolkýnovtyń aitýynsha, qazirgi kezde adamdar óz múmkindikterin asyra baǵalaidy.
«Kei adamdar eshqandai baǵyt-baǵdarsyz, daiyndyqsyz, tústen keiin taýǵa serýenge shyǵady. Olarǵa bári ońai siiaqty kórinedi. Alaida, olai isteýge bolmaidy. Taýda qiyndyqqa tap bolǵan adamdarǵa aitarym - óz betińizshe eshqandai sheshim qabyldamańyzdar. Birden qutqarý qyzmetine habarlasý kerek. Osy arqyly ýaqytty únemdep, tez kómek alasyz»,– deidi ol.
Sonymen qatar, mamandar taýda balalarǵa muqiiat bolýǵa shaqyrdy.
«Eger Siz balalardy ertip alsańyz, olarǵa muqiiat bolyńyz. Balalar árqashan úlkenderdiń aldynda júrýi tiis. Olardyń aiaǵy taiyp ketýi múmkin nemese shuńqyrlarǵa túsip ketedi. Sondai-aq, úlkenderdiń spirttik ishimdikten bas tartqany jón. Bul óte mańyzdy», - deidi respýblikalyq jedel-qutqarý jasaǵynyń bas qutqarýshysy Estai Álimjanov.
1 qańtardan 13 qazanyna deiingi aralyqta «109» biryńǵai telefon nómiriniń táýlik boiǵy kezekshilik-dispetcherlik qyzmeti Almaty qalasynyń turǵyndary men qonaqtarynan 125 myńnan astam qońyraý qabyldap, óńdegen.
Kásiporyn bólimsheleri 16658 shaqyrtýǵa shyqty.
