Jyl basynan beri 3 myńǵa jýyq qandas jeńildetilgen tártippen Qazaqstan Respýblikasy azamattyǵyn aldy. Bul týraly QR Ishki ister ministrliginiń resmi ókili Nurdildá Oraz aityp berdi, dep habarlaidy QazAqparat.
«Biylǵy 1 qańtardan bastap qandastarǵa Qazaqstanda turaqty turýǵa ruqsat alýǵa jáne Qazaqstan azamattyǵyna qabyldaýǵa bir mezgilde qujattar tapsyrý múmkindigi zańdy túrde engizilgen. Buryn olar bul protsedýralardan bólek ótetin, al turaqty turý rásimi 2 aiǵa sozylatyn. Sodan keiin bir ai ishinde turýǵa yqtiiarhat daiyndaldy, sodan keiin ǵana Qazaqstan azamattyǵyna qabyldaý úshin qujattar tapsyrýǵa bolatyn edi. Ony qaraý merzimi 3 aiǵa sozylatyn. Al qazir barlyq úsh kezeń bir ýaqytta ótedi», - dedi Nurdildá Oraz ministrliktiń aptalyq brifinginde.
Onyń aitýynsha, jyl basynan beri 3 myńǵa jýyq otandas Qazaqstan Respýblikasynyń azamattyǵyna osyndai tártippen qabyldanǵan.
«Qazirgi ýaqytta osy mysal boiynsha qandas kýáligin berýden bastap, azamattyqqa qabyldaýǵa deiingi sharalarǵa tartylǵan barlyq memlekettik organdar (EHÁQM, SIM, IIM, AQDM, jergilikti atqarýshy organdar) jumysynyń biryńǵai algoritmi engizilýde. Nátijesinde olar ár memlekettik organǵa jeke-jeke emes, tek bir ret-Halyqqa qyzmet kórsetý ortalyǵyna júginetin bolady. Qujattar tizimi de eki esege qysqardy, barlyq kezeńderden ótý merzimi 90 kúndi quraidy. Materialdardy barlyq memlekettik organdar qazirgidei kezek boiynsha emes, bir mezgilde qaraityn bolady», - dep túsindirdi QR IIM resmi ókili.
