Sýret: Mahambet Ábjannyń Facebook paraqshasynan
3 aqpanda Astananyń qylmystyq ister jónindegi mamandandyrylǵan aýdanaralyq soty jýrnalist Mahambet Ábjanǵa úkim shyǵardy. Ol 9 jylǵa bas bostandyǵynan aiyryldy, dep habarlaidy "Ult aqparat" Azattyq radiosyna silteme jasap.
Ábjanǵa "kórineý jalǵan aqparat taratý" (274-baptyń 3-bóligi) jáne "bopsalaý" (194-baptyń 4-bóligi, 2-tarmaǵy) baptary boiynsha aiyp taǵylǵan.
Buǵan deiin prokýror Qojahmetova aiyptalýshyǵa 11 jyl túrme jazasyn suraǵan edi.
Iske sýdia Aijan Qulbaeva tóraǵalyq etti. Al, sot protsesi jabyq ótti. Aldyn ala tyńdaý kezinde qorǵaýǵa qarsy tarap sotty jabyq ótkizýdi surap, sýdia ótinishti qanaǵattandyrǵan.
Aita keteiik, Sybailas jemqorlyqqa qarsy is-qimyl agenttigi ótken jyly 3 shildede 39 jastaǵy Mahambet Ábjandy "kásipkerden 50 million teńge bopsalady" degen kúdikpen qamaýǵa alǵan. Al jýrnalist advokaty arqyly taǵylǵan aiyptardy joqqa shyǵarǵan.
Ábjan byltyr qamaýǵa alynardan eki kún buryn Telegram-arnasynda ózin qaralaityn jalǵan aqparat taralyp jatqanyn jazǵan edi.
Eske salaiyq, buǵan deiingi sot protsesterinde Ábjan sot isti obektiv qaramai jatqanyn alǵa tartyp, sýdia Qulbaevany aýystyrý týraly ótinish jasaǵan. Buǵan iste jábirlenýshi retinde tanylǵan tulǵadan jaýap alý jáne aqshanyń kelý jolyn tutas zertteý týraly ótinishtiń oryndalmaǵany sebep bolǵan. Alaida sýdiany aýystyrý týraly ótinishi oryndalmady.
Buǵan qosa, aldyn ala tyńdaý kezinde aiyptalýshy men advokaty qysymǵa shaǵymdanǵan.
2017 jyly Mahambet Ábjan "alaiaqtyq" baby boiynsha 3,5 jylǵa bas bostandyǵynan aiyrylǵan. 2019 jyly shartty jaza alyp, merziminen buryn bostandyqqa shyqqan.
Byltyr "Jýrnalisterdi qorǵaý komiteti" Úkimetti synap júrgen jýrnalistiń ustalýyna alańdaýshylyq bildirdi.
Aita keteiik, "Shekarasyz tilshiler" halyqaralyq uiymynyń "Sóz bostandyǵy indeksinde" Qazaqstan 180 eldiń arasynda 122-orynda tur. Elde sóz bostandyǵynyń ahýaly kúrdeli dep baǵalanady.
