17 qyrkúiek, juma kúni Qazaqstandaǵy sanaýly táýelsiz basylymdardyń biri "DAT" gazetter jobasynyń shyǵarýshy redaktory, jýrnalist Baqytgúl Mákimbai 59 jasqa qaraǵan shaǵynda ómirden ozdy. Bul aqparatty gazettiń bas redaktory Ermurat Bapi habarlady, dep jazady Azattyq.
- Qazanyń sebebi – koronavirýs. Bir aiǵa jýyq aýrýhanada jatty. Sońǵy 10 kún jansaqtaý bóliminde boldy. Onyń qant diabeti bar edi. Dárigerler sózinshe, osy dert aýrýdy ýshyqtyryp jibergen, – dedi Bapi.
Jýrnalistiń qazasyna bailanysty áleýmettik jelide kóńil aitqan saiasatker Záýresh Battalova: "Jan joldasym, Baqytgúlim! Jazylasyń dep úmittenip edim. Oralmas saparǵa attanyp kettiń ǵoi... Imandy bol, qazaqtyń batyr qyzy!" dep jazdy.
Ermurat Bapi "DAT" gazetter jobasyn Baqytgúl Mákimbaimen 23 jyldan beri birge shyǵaryp kelgenin aitty. Ol: "Qiyn sátterde, basymyzǵa qiyn is túsken kezde kóp áriptesimiz shydamai, jumystan ketip qaldy. Biraq Baqytgúl olai istemedi. Osy kúnge deiin taban aýdarmai janymda birge qyzmet etti" dedi.
Baqytgúl Mákimbai 1962 jyly 15 qazanda Shyǵys Qazaqstan oblysynda dúniege kelgen.
Ol - Qazaqstan jýrnalister odaǵy syilyǵynyń, osy odaqtyń "Altyn medaliniń" iegeri. Qazaqstan patriottarynyń "Almas qylysh" syilyǵynyń laýreaty. Oǵan Soros qorynyń jýrnalistika salasyndaǵy "Batyldyǵy men tabandylyǵy úshin" syilyǵy da berilgen.
Ult portalynyń ujymy belgili jýrnalistiń mezgilsiz dúnieden ozýyna bailanysty onyń otbasy men týǵan-týystaryna qaiǵyryp kóńil aitady.
Marqumnyń jatqan jeri jaily, topyraǵy torqa bolsyn. Peiishte nury shalqyp, Jaratqan artyndaǵy urpaǵyna uzaq ǵumyr bersin!
