Jyl basynan beri jumysynan aiyrylyp, Memlekettik áleýmettik saqtandyrý qorynan áleýmettik tólem alǵandardyń sany 92,4 myńa jetti. Bul rette 10 747 azamatqa tólem qarasha aiynda taǵaiyndalǵan, dep habarlaidy "Ult aqparat".
Qoldanystaǵy zańnamaǵa sáikes jumystan bosatylǵan qyzmetkerler mindetti áleýmettik saqtandyrý júiesine qatysý ótiline jáne sońǵy 24 aidaǵy tabysyna bailanysty 1 aidan 6 aiǵa deiin áleýmettik tólem alady.
Járdemaqy joǵalǵan kiristiń 40%-yna deiingi mólsherde MÁSQ qarajaty esebinen tólenedi.
Tólem taǵaiyndaý úshin jumystan bosatylǵan qyzmetkerge:
- Egov.kz portalynda avtorizatsiialaný;
- «Jumysqa ornalastyrý jáne jumyspen qamtý» bóliminde «Jumys izdeýshi adamdardy tirkeý» qyzmetin tańdaý;
- Onlain-qyzmetke tapsyrys berip, barlyq joldardy toltyrý jáne oǵan ETsQ-men qol qoiyp, ótinimdi jiberý qajet;
- Bir kún ishinde turǵylyqty jerińizdegi halyqty jumyspen qamtý ortalyǵy bos jumys oryndaryn usynady;
- Eger jumys tabylmasa, 3 jumys kúni ishinde qashyqtyqtan jumyssyz mártebesi beriletin bolady (qajet bolǵan jaǵdaida qosymsha aqparat jinaý úshin sizge HJQO qyzmetkeri habarlasady);
Jumyssyz retinde tirkelý týraly málimetter bolǵan kezde Eńbekmininiń aqparat júiesi proaktivti formatta MÁSQ-tan tólemdi taǵaiyndaý boiynsha qyzmet kórsetýge kelisý úshin mobildi telefonǵa SMS-habarlama jiberedi.
Kelisken jaǵdaida SMS-habarlamaǵa jaýap berý qajet. Tólem avtomatty túrde taǵaiyndalady.
Esterińizge sala keteiik, MÁSQ qarajaty esebinen jumysynan aiyrylǵan jaǵdaida tólenetin áleýmettik tólem jumystan shyǵý sebepterine qaramastan júzege asyrylady jáne jumyssyz adam jumys izdegen kezeńde ony qoldaýǵa arnalǵan.
Budan buryn aitylǵandai, QR Eńbek jáne halyqty áleýmettik qorǵaý ministrligi aǵymdaǵy jyldyń 17 qarashasynan bastap respýblikalyq mańyzy bar qalalar men oblys ortalyqtarynyń turǵyndary úshin testilik rejimde elektrondy eńbek birjasy arqyly halyqty jumyspen qamtý ortalyqtarynyń qashyqtyqtan qyzmet kórsetý fýnktsionalyn iske qosty.
Pilottyq joba jumyssyzdardy tirkeý rásimin jeńildetý jáne jumyspen qamtýdy qoldaý boiynsha memlekettik qyzmetterdi, onyń ishinde jumysynan airylý boiynsha áleýmettik tólemderdi alýdy jeńildetý úshin iske qosyldy.
Endi barlyǵyn tek internet, kompiýter jáne elektrondyq tsifrlyq qoltańba arqyly ǵana jasaýǵa bolady.
