Foto: www.kmg.kz
Mańǵystaý oblysyndaǵy jumyssyz azamattar «Tatneft» kompaniiasyna jumysqa ornalastyrylmaq, dep habarlaidy QazAqparat «QazMunaiGaz» kompaniiasyna silteme jasap.
Tatarstandyvq kompaniia ókilderi Mańǵystaý óńiriniń, sonyń ishinde Jańaózen qalasynyń turǵyndarymen kezdesý ótkizdi. Jinalǵandarǵa bos oryndar týraly aitylyp, eńbek jaǵdailary túsindirildi.
Kompaniia 500-ge tarta adamdy jumyspen qamtýǵa daiyn, sonyń ishinde uńǵymalardy paidalaný jáne barlaý, kúrdeli jóndeý burǵyshylary, burǵyshynyń kómekshileri, mashinist, slesar, elektr dánekerleýshi, kólik júrgizýshi jáne basqa da mamandardy jumysqa qabyldaidy.
Sonymen qatar Oral jáne Aqtóbe qalalarynan jumys ornyna deiin kólikpen jetkizedi, jataqhana beredi, qajetti oqytý jáne qaita oqytý júrgizedi.
Jumysshylarǵa vahta ádisimen jumys isteý usynylyp otyr. Bir ai jumys istep, bir ai demalady. Uńǵymany burǵylaý jáne kúrdeli jóndeý salasyndaǵy ortasha eńbekaqy 78,5 myń rýbl, mehanikalyq jabdyqty jóndeý salasynda – 52,5 myń rýbl, al kólik júrgizýshilerdiń jalaqysy 55 myń rýbldi quraidy. Ortasha jalaqy kóleminde vahtada bolatyn kezeńdegi jáne vahtaaralyq demalysqa beriletin jalaqy qosa eseptelgen.
Búginde Mańǵystaý oblysyna qarasty aýdandar men qalalardan 500-den asa úmitker ótinish berdi. Onyń 178 adamy irikteýden ótti.
Jumyssyz azamattardan ótinish qabyldaý áli de jalǵasýda. Mańǵystaý oblysynyń jumyspen qamtýdy úilestirý jáne áleýmettik baǵdarlamalar basqarmasy bergen aqparaty boiynsha taǵy 170 adam jumys ornalasýǵa niet bildirdi. Endi shilde aiynyń ortasynda úmitkerlerdi irikteýdiń ekinshi kezeńi ótedi.
Tatneft ókilderi úmitkerlerdi irikteý jáne testileýdi Aqtaý qalasynda ótkizedi.
