Jumyssyz jastardy kásibi bilimmen qamtý máselesin jan-jaqty pysyqtaý qajet. Bul týraly búgin Úkimet otyrysynda QR Premer-Ministriniń orynbasary Eraly Toǵjanov aitty, dep habarlaidy QazAqparat.
«Josparlanǵan is-sharalar bilim berý júiesin jańa deńgeige kóterip, básekege qabilettiligin arttyrýǵa baǵyttalǵan. Birneshe baǵytqa nazar aýdarǵym keledi. Birinshiden, 2-6 jastaǵy balalardy mektepke deiingi bilim berýmen qamtýdy 2025 jylǵa deiin 95 paiyzǵa jetkizýdi qamtamasyz etý mindeti tur. Ol tolyqtai oryndalady. Ekinshiden, ákimdikter biyl salynýy tiis 200 jańa mektep qurylysyna, jańǵyrtylýy qajetti 1 015 mektepke turaqty monitoring júrgizý jáne onyń oryndalýy týraly ai saiyn aqparat berip otyrǵany durys», - dedi Úkimet basshysynyń orynbasary.
Úshinshiden, ol orta bilim berýge bailanysty aýyl men qaladaǵy bilim sapasyn teńestirý máselesi kún tártibinde turǵanyn basa aitty. Sondyqtan ákimder osy baǵytty erekshe baqylaýǵa alýy qajettigin eskertti.
«Tórtinshiden, óńirlerde biyl engizilgen qosymsha bilim berý memlekettik tapsyrysyn iske asyrýǵa jan-jaqty daiyndyq júrgizilýi tiis. Ashyǵyn aitqanda bul jańalyqty kópshilik kútip otyr. Sondyqtan qajetti qarjy bólinip, tiisti uiymdastyrý jumysy iske asyrylýy kerek. Besinshiden, bilim ministrligi ákimdiktermen birge tegin kásibi-tehnikalyq bilim berý aiasynda jumyssyz jastardy kóbirek kásibi bilimmen qamtý máselesin de jan-jaqty pysyqtaýy qajet», - dedi Eraly Toǵjanov.
