QR Premer-Ministriniń tóraǵalyǵymen ótken Qazaqstan Úkimetiniń selektorlyq otyrysynda Eńbek jáne halyqty áleýmettik qorǵaý ministri B. Nurymbetov halyqty jumyspen qamtý sharalary týraly baiandady, dep habarlaidy "Ult aqparat".
Onyń aitýynsha, halyqty jumyspen qamtýdyń negizgi quraly Jumyspen qamtýdyń jańa jol kartasy bolady. Ony iske asyrýǵa 1 trln tg qarastyrylǵan. Baǵdarlamada 7 myńnan astam joba qamtylatyn bolady. Olardyń 300-den astamy jańa turaqty jumys oryndaryn qurýǵa múmkindik beretin óndiristik, perspektivaly jobalar.
«Jumysshylardyń eńbekaqysy 85 myń teńgeden tómen emes 242 myń jumys orny ashylady. Jol kartasynyń talaptary men sharttary boiynsha keminde 90% otandyq jumyskerler bolýy tiis. Jumysqa tartylǵan qyzmetkerlerdiń keminde jartysy jumyssyz jastarǵa basa nazar aýdara otyryp, halyqty jumyspen qamtý ortalyqtary arqyly tartylýy tiis», — dedi Eńbek jáne halyqty áleýmettik qorǵaý ministri.
El Prezidentiniń tapsyrmasy boiynsha iri qalalarda jumys istegen jáne búgingi kúni jumyssyz qalyp otyrǵan óńirlerdegi jastar Jol kartasynyń jobalaryna qatysa alady. Olarǵa 85 myń teńge kóleminde kóterme aqy tólenedi. Bul úshin jergilikti atqarýshy organdar mobildi pýnktter quryp, olardy jumysqa tartý jóninde sharalar qabyldaýy tiis.
«Búgingi tańda ákimdikter jumyssyzdardy qabyldaý kezinde jergilikti jumyspen qamtý ortalyqtarynyń elektrondyq júielerin tolyqqandy paidalanýdy qamtamasyz etýi tiis. Jol kartasy aiasynda júzege asyrylatyn jobalardyń 35%-y áleýmettik sala nysandaryna, 34%-y injenerlik-kólik infraqurylymyn jańǵyrtýǵa, 14%-y turǵyn úi-kommýnaldyq máselelerdi sheshýge, 17%-y eldi mekenderdi abattandyrýǵa baǵyttalǵan», — dedi B. Nurymbetov.
Óńirler bólinisinde 62-den 1695-ke deiin joba usynyldy, olardyń 12%-y — iri óndiristik jobalar.
«Endi ákimder halyqty jumysqa barynsha tartyp, atalǵan jobalardy sapaly ári ýaqytyly júzege asyrýy kerek. Jumyspen qamtý boiynsha “Eńbek” baǵdarlamasy da iske asyrylýda. Bul baǵdarlamany júzege asyrýǵa qosymsha 50 mlrd teńge bólinip, qosymsha 136 myń jumys orny ashylady», — dedi B. Nurymbetov.
Jalpy, Jumyspen qamtýdyń jol kartasy biyl 600 myńnan astam adamdy jumyspen qamtamasyz etedi degen boljam bar.
Sonymen qatar, Memleket basshysynyń tapsyrmasy boiynsha TJ rejimi kezeńinde elimizde óz tabystarynan aiyrylǵan tulǵalarǵa MÁSQ qorynan 42 500 teńge mólsherinde áleýmettik tólem engizildi. Bul tólemderdi resmi ózin-ózi jumyspen qamtyǵandar da, beiresmi túrde jumys isteitinder de ala alady. Resmi emes jumys isteitin ózin-ózi jumyspen qamtyǵan azamattardy eskere otyryp, 3 mln-ǵa deiin jumysker qamtylýy múmkin, jalpy tólemge bólinetin qarajat aiyna 127,5 mlrd teńgeni quraidy.
