Jyl basynan jalaqy bereshegi boiynsha berilgen uiǵarymdy oryndamaǵan jumys berýshilerge qatysty sot oryndaýshylaryna 718 is joldandy.
Bul jaiynda Májilis depýtattarynyń saýalyna QR Premer-Ministri Asqar Maminniń jaýabynda aitylǵan, dep habarlaidy "Ulta qparat".
«Qazaqstan Respýblikasynyń Úkimeti eńbek quqyqtarynyń buzylý faktilerin, sondai-aq jalaqy bereshekterin boldyrmaýǵa qatysty jumystardy kúsheitip, tiisti sharalar qabyldaýda. Osy jyldyń 5 naýryzyna elimizde jalaqy beresheginiń somasy 2020 jyldyń osy kezeńimen salystyrǵanda (1,1 mln teńge) 62 mln teńgege nemese 4 paiyz tómendep, 1 mlrd teńgeni qurady. Jalaqy bereshegine jol bergen 210 kásiporynnyń basshylaryna memlekettik eńbek inspektorlary 189 uiǵarym berdi jáne 18,5 mln teńgege aiyppul salynyp, 1,8 myń jumysker aldyndaǵy 814,6 mln teńge somasynda jalaqy bereshegi óteldi.
Jyl basynan beri jalaqy bereshegi boiynsha berilgen uiǵarymdy oryndamaǵan jumys berýshilerge qatysty sot oryndaýshylaryna 718 is joldandy, ol ótken jylmen salystyrǵanda 40 ese kóp», - dedi Asqar Mamin.
Onyń atap ótýinshe, Qazaqstan Respýblikasynyń eńbek zańnamasynyń saqtalmaýy, onyń ishinde jumyskerlerge jalaqy tólemeý bóliginde shaǵyn jáne mikrokásipkerlik sýbektilerine qatysty tekserýler taǵaiyndaý algoritmi bekitilip, jergilikti atqarýshy organdarǵa jumys úshin joldandy.
«Jańa Algoritmniń ólshemsharttary negizinde jyl basynan bastap 22 shaǵyn jáne mikrokásipkerlik sýbektisinde jospardan tys tekserýler júrgizildi. Sondai-aq jalaqy bereshegi bar kásiporyndar, onyń ishinde shaǵyn jáne mikrokásipkerlik kásiporyndarynyń basshylary algoritmge sáikes óńirlerdiń Daǵdarysqa qarsy shtabtary men áleýmettik áriptestik jáne áleýmettik-eńbek qatynastaryn retteý jónindegi úshjaqty komissiialarynda tyńdalýda», - dedi Úkimet basshysy.
