Túrkistan oblysynda "Jumabektiń bajasymyn!" degen kólik júrgizýshiniń zańsyz áreketinen keiin politsiia maiory jumystan bosatyldy, dep habarlaidy "Ult aqparat" oblystyq politsiia departamentine silteme jasap.
"Memlekettik qyzmetshilerdiń ádep kodeksi men politsiia standarttaryn buzǵany úshin Túrkistan oblystyq politsiia departamenti tártip komissiiasynyń sheshimimen Otyrar aýdandyq politsiia bólimi ákimshilik politsiia bólimshesiniń bastyǵy, politsiia maiory Jumabek Tólegen atqaryp otyrǵan laýazymynan bosatyldy", - dedi oblystyq politsiianyń resmi ókili Saltanat Qarakózova.
Onyń aitýynsha, maior ishki ister organdary quramynan shyǵarylǵan joq. Túrkistan oblystyq politsiia departamentiniń rezervinde qaldy.
Aita keteiik, ótken aptada áleýmettik jelide jol qozǵalysy erejesin óreskel buzǵan kólik júrgizýshiniń videosy taraǵan bolatyn. Ol politsiiaǵa baǵynbai, ustalǵan jerinen op-ońai ketip qalǵan. Politsiia qyzmetkeri qujat suraǵanda: "Ne boldy? Men - Jumabektiń bajasymyn. Qazir Jumabek keledi. Jumabekke zvondasai", - deidi de kete beredi.
Politsiia Lada Priora mingen "Jumabektiń bajasyn" ustady. Ol Ákimshilik quqyq buzýshylyq týraly kodekstiń eki baby boiynsha jazaǵa tartyldy. Al avtokóligi aiyp turaǵyna qoiyldy. Qyzmettik tekseris kezinde Jumabektiń kim ekeni de anyqtaldy. Onyń qaramaǵynda eki adam jumys isteidi eken.
