Ortalyq kommýnikatsiialar qyzmeti Prezident Joldaýynyń qorytyndysy boiynsha qazaqstandyqtar arasynda júrgizilgen ekspress-saýalnama nátijelerin usyndy, - dep habarlaidy Tengrinews.kz.
Saýalnama nátijesi boiynsha, qazaqstandyqtardyń 43,46 paiyzy Prezident Joldaýynyń mazmunyn jaqsy biledi. Taǵy 48,88 paiyzy jańa sharalar týraly estigen, biraq egjei-tegjeilerin bilmeidi. Al 7,67 paiyzy Joldaý mazmunymen áli tanysyp úlgermegen.
"Saýalnamaǵa sáikes, Prezident usynystary odan habardar azamattardyń basym kópshiligine - 80,07 paiyzyna oń áser qaldyrǵan. Usynystarǵa 14,73 paiyz adam beitarap áser qaldyrdy. 1,11 paiyz jaǵymsyz áser qaldyrǵan.
Bala kútimi boiynsha bir jarym jasqa deiingi tólemder kezeńiniń ulǵaiýy (54,15 paiyz), Ulttyq qordyń jyl saiynǵy investitsiialyq kirisiniń 50 paiyzyn 18 jasqa deiingi balalardyń shottaryna aýdarý (51,27 paiyz), eń tómengi jalaqyny 70 myń teńgege deiin ósirý (46,07 paiyz), áielderdiń zeinet jasyn 61 jas (41,53 paiyz) dep belgileý, 100 myń jas qazaqstandyqty (37,87 paiyz) jumyspen qamtamasyz etý týraly taqyryptar Joldaýmen tanysqan azamattardyń qodaýyna ie boldy", - delingen habarlamada.
Zertteý 1 qyrkúiekte elimizdiń 20 óńirindegi 18 jáne odan joǵary jastaǵy 800 qazaqstandyqtyń arasynda ár óńirdegi qalalar men aýyldardy iriktep qamtylǵan onlain saýalnama ádisimen júrgizilgeni atap ótildi.
Ortalyq kommýnikatsiialar qyzmeti málimetinshe, saýalnama nátijelerin Qazaqstannyń barlyq turǵynyna ekstrapoliatsiialaýǵa bolady – zertteýdiń tańdaýy el turǵyndarynyń áleýmettik-demografiialyq jáne aýmaqtyq qatystylyǵynyń sipattamalaryn eskere otyryp qurastyrylǵan.
