- QR Ishki ister ministrligi Ákimshilik politsiia komitetiniń resmi ókili Irina Lýkianinanyń aitýynsha, jańa jyldan bastap engizilgen «jańalyqtyń» halyq durys túsinbei qalǵan bir tusy bar.
Shuǵyl izdestirý sharalary barysynda jol-patrýldik politsiia qyzmetkeri kóshede turyp, izdeý jariialanǵan kólikterdi qolmen toqtata alady, dep habarlaidy Ult.kz tilshisi QazAqparat agenttigine siltem jasap.
«Iá, osyny durys túsinip alý qajet. Kólikti toqtatqannan keiin júrgizýshi tarapynan politsiia qyzmetkeriniń áreketi qanshalyqty zańdy ekenine qatysty suraq týyndaýy múmkin. Olar birden basshylyqtyń resmi hatyn talap etedi. Ony da jaqsy bilemiz. Alaida jol qozǵalysy erejelerine sáikes, jol politsiiasy qyzmetkeri tek óziniń qyzmettik kýáligin ǵana kórsetýi tiis. Basqa qujattardy kórsetýge mindetti emes. Máselen,erteń bireýdi joldyń jieginde turǵan bir politsei qolmen toqtatyp, shuǵyl izdestirý sharalarynyń bastalǵanyn jáne kóliktiń qylmys jasalǵan mashinaǵa uqsaitynyn málimdese, kez kelgen kólik júrgizýshisi «102» telefon nómirine qońyraý shalyp,izdestirý sharasy júrip jatyr ma, joq pa, anyq bile alady. Sosyn kólik júrgizýshisi jol-patrýldik politsiia qyzmeteriniń aty-jónin, tós belgisiniń nómirin jazyp alyp, aryz-shaǵym túsirse de bolady. Biz qyzmetkerdiń kólikti zańdy toqtatty ma, joq pa, jan-jaqty tekserip shyǵamyz. Kólikti negizsiz toqtatsa, politsiia qyzmetkeri jaýapqa tartylady. Sondyqtan kóshede jol politsiiasy qolmen toqtatsa, mindetti túrde toqtaý qajet», - deidi I.Lýkianova.
Onyń aitýynsha, «jol-patrýldik politsiia qyzmetkerine kólikti qolmen toqtatýǵa ruqsat joq» degendi halyq birjaqty túsinip, jol politsiiasy kóshede kólikti múldem toqtata almaidy dep qabyldady. Jańa ózgeristerge sáikes, jol qozǵalysy erejelerin tolyǵymen avtopatrýl baqylaidy. Al qalanyń kire berisindegi ótkizý beketterinde, sondai-aq tótenshe jaǵdailar men shuǵyl izdestirý sharalary kezinde jol-patrýldik politsiia qyzmetkerleri kólikterdi qolmen toqtata alady.
Eske salaiyq, 2017 jyldyń 1 qańtarynan bastap Qazaqstanda ishki ister organdarynyń qyzmetkerleri kólikti toqtatý úshin arnaiy taiaqshalardy qoldanbaidy.
Ishki ister ministrliginen málim etkendei, endigide politseiler kólikti toqtatý úshin qolyn kóterip, «Toqta!» degen belgi beredi jáne sonymen birge, ysqyryqty nemese arnaiy dybys kúsheitkish jáne jaryq beretin quraldardy qoldanady. Jol erejesin buzýshylar sondai-aq avtopatrýlmen toqtatylatyn bolady.
«Jol erejesin buzǵandardy anyqtaý úshin beinekameralar, sonymen birge ishki ister organdarynyń beine tirkeýishteri qoldanylady», - dep túsindirdi IIM Memlekettik til jáne aqparat departamentiniń direktory Almas Sádýbaev.
