Foto: Aikyn.kz
Qazaqstanda avtojol salasyndaǵy barlyq jobalar «Tsifrlyq teńge» baǵdarlamasy arqyly júzege asyrylatyn bolady. Bul týraly kólik ministri Nurlan Saýranbaev Úkimette ótken baspasóz máslihatynda málimdedi, dep habarlaidy Ult.kz.
Qarajatty maqsatsyz paidalanýǵa qatysty jáne sybailas jemqorlyqqa qarsy kúres jónindegi suraqqa jaýap bere otyryp, Nurlan Saýranbaev temirjoldaǵy iri jobalardy júzege asyrý tsifrlyq teńgege aýystyrylǵanyn habarlady. Mundaǵy qarjylandyrýdyń búkil protsesin Ulttyq bank retteidi. Sondyqtan da bul qarajatty naqty maqsatyna sáikes jumsaýǵa múmkindik beredi.
«Avtojoldarǵa keletin bolsaq, biz Pavlodar men Atyraýda eki joba boiynsha osyndai pilottyq jobany bastadyq. Qazirdiń ózinde baǵa aiyrmashylyǵyn sezinip otyrmyz. Biz avtojoldar boiynsha barlyq jobalardy tsifrlyq teńge arqyly júzege asyratyn bolamyz. Osyndai baqylaýdyń arqasynda aqsha maqsatsyz jumsalmaityn bolady», - dep atap ótti ministr.
Spiker osy júieniń arqasynda qarajatty aýdarýdyń barlyq protsesi ashyq jáne baqylaý ońai bolatynyn túsindirdi. Memlekettik kirister komitetimen birlesip munyń bári qatań baqylanady.
«Tsifrlyq teńge» degenimiz, bul – úlken baǵdarlama. Premer-ministr tiisti jiyn ótkizip, tapsyrma berdi. Pilottyq baǵdarlama iske qosyldy. Jol kartasy boiynsha merzimder belgilendi. Biz qurylys jumystary tsifrlyq teńge arqyly júzege asyrylýy tiis degen shart qoiamyz. Bul basqa jerge aqy tóleýge múmkindik bermeitin júz paiyz ashyqtyqty qamtamasyz etedi», — dep atap ótti Nurlan Saýranbaev.
