© Sputnik / Aleksei Vovk
Semei turǵyny júzdegen adamnyń atyna shaǵyn kreditti zańsyz rásimdegen. Bul týraly kriminaldyq politsiia departamenti basshysynyń orynbasary Qanat Nurmaǵambetov málimdedi, dep habarlaidy Sputnik Qazaqstan.
"Atyraý oblystyq politsiia departamentiniń qyzmetkerleri Semei qalasynyń turǵynyn ustady. Ol áleýmettik jelide jeke qujattardyń joǵalǵany týraly habarlandyrýlardy taýyp, sol qujattar boiynsha shaǵyn kreditke ótinish berip otyrǵan. Adamdar kreditti tóleý merzimi ótip ketken kezde ǵana qaryzdyń bar ekenin bilgen. Qazirgi kezde zardap shekken 320 adam anyqtaldy. Olarǵa 10 million teńgeden astam shyǵyn kelgen", - dedi Nurmaǵambetov ishki ister ministrliginiń baspasóz ortalyǵynda ótken onlain brifingte.
Onyń aitýynsha, alaiaqtar halyqty aldaýdyń san alýan ádisterin qoldanyp jatady. Sol sebepti osy sanattaǵy qylmystar jyl saiyn artyp keledi.
"Tsifrlyq tehnologiialardyń damýymen internet-alaiaqtyq ta kóbeiip jatyr. Máselen, 2019 jyly Qazaqstanda 7 700 qylmys tirkelse, 2020 jylda ondai qylmystardyń sany 14 myńnan asty. Al biyl on aida ótken jyldyń osy kezeńimen salystyrǵanda internet-alaiaqtyq 80 protsentke ósip, 17 800 qylmysty qurady", - dep atap ótti Nurmaǵambetov.
Osy qylmystardyń basym bóligi habarlandyrý arqyly jasalady. Alaiaqtar belgili bir taýardy shyǵarady da, aldyn ala tólemdi suraidy. Al aqshany alǵan soń, ushty-kúili joq bolyp ketedi.
Shaǵyn nesieler de jii zańsyz rásimdelip jatady. Budan bólek, alaiaqtar ózderin bank qyzmetkeri retinde tanystyryp, adamnyń jeke málimetterin iemdenedi. Sóitip, esepshottaǵy aqshany qoldy qylady.
