Foto: Polisia.kz
Ótken jyly 22 myńnan astam adam Qazaqstan azamattyǵyn aldy. Bul týraly IIM-niń aptalyq brifinginde aityldy, – dep habarlaidy "Ult aqparat" Polisia.kz portalyna silteme jasap.
"Jyl saiyn 20 myńǵa jýyq tilek bildirýshi el azamattyǵyn alý máselesi boiynsha júginedi. Táýelsizdik jyldary bir millionnan astam adam Qazaqstan azamattyǵyn aldy. Al ótken jyly – 22 myń, onyń ishinde QR Prezidentiniń Jarlyǵymen – 1375, jeńildetilgen tártippen – 20 myńnan astam adam azamattyqqa qol jetkizdi.
Onyń ishinde: 17,5 myńnan astamy qandas (17 676), Qazaqstan, Belarýs, Qyrǵyzstan jáne Resei arasyndaǵy azamattyqqa qabyldaýdyń jeńildetilgen tártibi týraly kelisim boiynsha – 1287, turmysqa shyqqan áieldiń azamattyǵy týraly Konventsiia boiynsha – 1777" - delingen habarlamada.
IIM BUU BJKB-nyń Qazaqstandaǵy ókildigimen jáne ÚEU-men birlesip, eki jyl ishinde qujatsyz, sondai-aq azamattyǵy belgisiz adamdardy anyqtaý jáne tirkeý boiynsha keń aýqymdy aktsiia ótkizgen.
Aktsiia nátijesinde azamattyǵy joq, qujattary joq 8 myńnan astam adam anyqtalǵan. Onyń ishinde 5 myń adam Qazaqstan azamattyǵyna jatatynyn rastap, jeke kýálikteri rásimdelgen. 3 myńnan astamyna azamattyǵy joq adamnyń kýáligi berildi.
Aita ketý kerek, Qazaqstan qos azamattyqty moiyndamaidy, sondyqtan mundai faktilerdi anyqtaý boiynsha jumys erekshe baqylaýda. Zańnamada elimizdiń azamattyǵynan aiyrylǵan adamnyń Qazaqstan azamatynyń tólqujatyn nemese jeke kýáligin paidalanǵany, sondai-aq zańda belgilengen adamdarǵa habarlamaǵany úshin ákimshilik jaýapkershilik kózdelgen. Qos azamattyǵy bar faktini jasyrǵany úshin 200 AEK-ke deiin aiyppul salý ne QR shekarasynan shyǵarý qarastyrylǵan.
Vedomstvo elimizdiń azamattyǵynan aiyrylǵan azamattyń Qazaqstan azamatynyń tólqujatyn nemese jeke kýáligin paidalanǵany, sondai-aq zańda belgilengen adamdarǵa habarlamaǵany úshin zańnamada ákimshilik jaýapkershilik qarastyrylǵanyn eske saldy.
"Máselen, ótken jyly qos azamattyǵy úshin 841 adam ákimshilik jaýapkershilikke tartyldy, sottardyń sheshimderimen 138 adam elden shyǵaryldy, qalǵandaryna aiyppul salyndy.
Sońǵy bes jylda azamattyq týraly zańnamany buzǵan 3515 adam jaýapqa tartyldy, onyń 3 myńnan astamyna aiyppul salyndy, 473-i elden shyǵaryldy. Barlyǵynyń qazaqstandyq azamattyǵy joiyldy.
Biyl qos azamattyq faktileriniń aldyn alý úshin ekinshi azamattyǵyn jasyrǵandarǵa jaýapkershilikti qatańdatý úshin zańnamalyq aktilerge túzetýler engizý josparlanyp otyr.
Ózge azamattyqty qabyldaý kezinde zardaptardyń bolmaýyn qamtamasyz etý maqsatynda basqa elderge ketken jáne ózge de azamattyqty qabyldaǵan Qazaqstannyń burynǵy azamattary 30 táýlik ishinde azamattyǵyn joǵaltýdy tirkeý úshin Qazaqstannyń konsýldyq mekemesine júginýi qajet" - delingen habarlamada.
