Qazaqstan reprodýktivti meditsina qaýymdastyǵynyń prezidenti, QR bas reprodýktology Viacheslav Lokshin ekstrakorporaldy uryqtandyrý tehnologiiasynyń damýy donor qyzmetine suranysty azaitqanyn aitty, dep habarlaidy QazAqparat.
«Biyl «eko» arqyly dúniege kelgen alǵashqy qazaqstandyq bala 25-ke keldi. Osynaý 25 jyldyq qysqa ýaqyttyń ishinde elimizde 85 myń erli-zaiypty emdeýden ótken. Qazan aiynda «eko» arqyly 25 myńynshy bala ómirge keldi. Bul - óte mańyzdy oqiǵa deýge bolady. Osy qysqa ýaqytta elimizde zamanaýi tehnologiialardyń bári engizilgenin aitý kerek. Onyń arasynda implantatsiia aldyndaǵy genetikalyq skrining te bar. Iaǵni, búginde 5 kúndik embrionnyń búkil hromosomalaryn zertteýge múmkindik bar. Osynyń arqasynda patologiiasy bar embriondy jatyrǵa salmai turyp diagnostikalaýǵa bolady», - dedi ol ortalyq kommýnikatsiialar qyzmetinde ótken brifingide.
Onyń aitýynsha, qazirgi tehnologiialardyń arqasynda erlerdiń belsizdigin emdeýdiń túrli tásilderi taralǵan.
«Ekobaǵdarlamalar aiasynda júrgiziletin emniń shamamen 50 paiyzy erlerdiń syrqatymen bailanysty. Jalpy, bala súie almai júgingenderdiń 40 paiyzynda - áiel bedeýligi, 30 paiyzynda - erlerdiń faktory, qalǵanynda ekijaqty faktor kezdesedi. Erler faktory «eko» jasatýǵa jii sebep bolady. Toqsanynshy jyldary ICSI tehnologiiasy paida bolǵannan beri jumyrtqa jasýshasyna bir ǵana cpermatozoid salý arqyly uryqtandyrýǵa bolatyny dáleldendi. Sonyń arqasynda belsiz dep tanylǵan erlerdiń kóbi óz kindiginen shyqqan bala súiý múmkindigine ie bolyp otyr. Qazir donordyń uryǵyna suranys sirek», - dedi Viacheslav Lokshin.
