Qajet bolǵan jaǵdaida Qazaqstan "Jibek joly" kemesin jalǵa alǵan reseilik kompaniiamen kelisimshartty buza alady. Bul týraly Indýstriia jáne infraqurylymdyq damý ministri Qaiyrbek Óskenbaev aitty, - dep habarlaidy Tengrinews.kz.
"Qazaqstandyq taraptyń ustanymy - kemeni jalǵa berdik. Oǵan osy kemeni jalǵa alǵan adam jaýapty. Kemeni jalǵa alǵan kezde shekteýler bolady, isteýge bolatyn, bolmaityn. Eger ol Qazaqstanda qabyldanǵan quqyqtyq normalarǵa jáne halyqaralyq quqyqqa sáikes kelmeitin qandai da bir qyzmetpen ainalysatyn bolsa, árine, bul kelisim buzylady jáne keme keri qaitarylady", - dedi Óskenbaev Úkimet kýlýarynda jýrnalister suraǵyna.
Onyń aitýynsha, oqiǵaǵa túrik tarapy quqyqtyq baǵa berýi kerek, ol júktiń shyǵý tegin anyqtaidy - kim jaldaýshy, kim júk jiberýshi.
"Sonda bári belgili bolady, qandai sanktsiialyq shekteýler bolǵany. Quqyqtyq baǵa berilgen soń shartty buzyp, kemeni qaitarýdyń quqyqtyq saldary bar ma, joq pa, túsinikti bolady", - dep tolyqtyrdy ministr.
Qaiyrbek Óskenbaev Qazaqstan tarapy Túrkiiaǵa tiisti saýal joldaǵanyn qosty. Alaida ol sot qorytyndysyn kútýge shaqyrdy.
"Biraq biz bul oqiǵaǵa aralasyp, mazalamai ony zań aiasynda anyqtaý kerek, sebebi bul zań salasynda. Olar quqyqtyq baǵa bergennen keiin biz kelisimshartty buzý nemese buzbaý týraly sheshim qabyldaimyz", - dep túiindedi ministr.
Eske salaiyq, buǵan deiin astyq satý mámilesi estoniialyq Mangelbert OU kompaniiasy men túrik tarapy arasynda júrgizilgeni habarlanǵan edi. Eýropada tirkelgen kompaniia mámileniń zańdy ekenin málimdep otyr. Jaǵdaidy túsindirý jáne halyqaralyq quqyqbuzýshylyqtardy boldyrmaý maqsatynda QTJ kemeni jalǵa alýshyǵa barlyq rastaýshy qujatty (kelisimsharttar, kýálikter jáne t.b.) qosa bere otyryp, mán-jaidy jedel túrde egjei-tegjeili túsindirýdi surap hat joldady. QTJ halyqaralyq quqyq normalaryn saqtaýǵa mindetti ekenin habarlaǵan bolatyn.
Reuters málimetinshe, Ýkraina Túrkiiaǵa "Jibek Joly" júk kemesin ustaý jáne tutqyndaý týraly ótinish bildirgen. Ol Resei basyp alǵan Berdiansk portynan Ýkraina astyǵyn tasymaldaǵan.
