Jezqazǵanda Nazarbaev ziiatkerlik mektebi ashylady. Bul úshin qazirdiń ózinde qajetti ruqsat alyndy, dep habarlaidy "Ult aqparat".
Jańa bilim ordasyndaǵy oqý sharttary men sapasy respýblikanyń iri qalalaryndaǵy osyndai mekteptermen birdei bolady. Bul týraly Qaraǵandy oblysynyń ákimi Jeńis Qasymbek apparattyq jiynda málimdedi.
Nazarbaev ziiatkerlik mektebi aimaqta jaqyn bolashaqta qurylysy josparlanǵan alty bilim berý uiymynyń biri bolady. Sonymen qatar Qaraǵandyda taǵy eki orta mektep, basqalary Terekti, Shet jáne Ulytaý aýdandarynda paida bolady.
«Jańa mektepter qurylysynyń arqasynda oqý oryndarynyń sany jetkilikti bolady. Osylaisha biz jumys júktemesi men úsh aýysym máselelerin sheshemiz. Endigi bizdiń basty mindetimiz - 30 jastan asqan mektep ǵimarattaryna kúrdeli jóndeý júrgizý. Qaraǵailyda «Aýyl - el besigi» jobasy aiasynda ǵimaratty jóndeýge 500 million teńgege jýyq qarjy bólindi. Dál osyndai jumys Egindibulaqta josparlanǵan», - dedi Jeńis Qasymbek. Sondai-aq, oblys ákimi erekshe qajettilikteri bar balalarǵa jaǵdai jasaý kerektigin aitty.
Aimaq basshysy qalalar men aýdandardyń ákimderine bir apta ishinde kúrdeli jóndeýdi qajet etetin mektepterdiń tolyq tizimin berýdi tapsyrdy.
Osy protsesti jáne bolashaqta jóndeý barysyn baqylaý úshin Jeńis Qasymbek jumys toptaryn qurýdy tapsyrdy. Olardyń quramyna qamqorshylyq keńes músheleri jáne úkimettik emes uiymdardyń ókilderi kiredi.
