Foto: videodan skrinshot
Jetisý oblysynda kámeletke tolmaǵan ulyn aiaýsyz soqqyǵa jyqty dep aiyptalǵan 28 jastaǵy áielge qatysty sot sheshimi shyqty, dep habarlaidy Ult.kz.
Óz balasyn azaptaǵan ananyń ústinen qozǵalǵan qylmystyq is Panfilov aýdandyq sotynda qaraldy.
Oqiǵa biylǵy jyldyń 18 qańtarynda Nurkent kentindegi kópqabatty turǵyn úilerdiń birinde bolǵan. Videoda jas áieldiń shamamen úsh-tórt jastaǵy kishkentai balany aiaýsyz soqqyǵa jyqqany beinelengen. Áiel jylý batareiasyna bailanǵan balany uryp, tepkilep tastaidy.
Keiinirek áieldiń balasyn jýynatyn bólmedegi krandy jabýdy umytyp ketkeni úshin osylai “jazalaǵany” belgili boldy.
Tergeý barysynda áieldiń psihikalyq aýytqýy bar ekeni anyqtalyp, ol qylmystyq jaýapkershilikten bosatyldy. Sot-psihiatriialyq saraptama qorytyndylaryn eskere otyryp, sot áieldi májbúrli emdeýge jiberý týraly sheshim qabyldady.
“Sot sheshim qabyldaý kezinde balanyń anasyna qatysty saraptama qorytyndylary negizge aldy. Oǵan minez-qulqynda aiqyn buzylystary bar, kútim men emdeýdi qajet etetin jeńil dárejedegi aqyl-oi kemistigi diagnozy qoiylǵan. Qylmys jasalǵan sátte ol óz áreketteriniń naqty sipaty men qoǵamdyq qaýiptiligin túsine almaǵan ári olardy basqara almaǵan. Psihikalyq jai-kúiine bailanysty áiel sot protsesine qatysýǵa qabiletsiz jáne ózi men ainalasyndaǵylarǵa qaýip tóndiredi. Osyǵan bailanysty ol qylmystyq jaýapkershilikten bosatylyp, jalpy tiptegi psihiatriialyq statsionarda májbúrli emdeý túrindegi meditsinalyq shara qoldanyldy”, – dedi Jetisý oblysy sotynyń baspasóz qyzmetiniń basshysy Nursultan Orynbasarov.
Aiyptalýshynyń tórt jáne eki jastaǵy uldary qazir Taldyqorǵan qalasyndaǵy balalar mekemeleriniń birinde tárbielenýde. Jaqyn arada sot qorǵanshylyq jáne qamqorshylyq organdary jinaǵan materialdardy qarap, balalarǵa qatysty sheshim qabyldaýy tiis.
Eske salsaq, buǵan deiin qazaqstandyq áiel óz balasyn jylý batareiasyna bailap, aiaýsyz uryp-soqqany týraly jazǵan edik. Oqiǵanyń videosy jelide taraǵannan keiin balasyn aiaýsyz urǵan áiel ýaqytsha ustaý izoliatoryna qamaldy.
