Túrkistan oblysy, Jetisai aýdanyna jańa ákim taǵaiyndaldy. QR Prezidenti Ákimshiliginiń kelisimimen, rotatsiia tártibimen bul qyzmetti Murat Qadyrbek atqaratyn boldy, dep habarlaidy "Ult aqparat".
Jańa ákimdi aýdannyń áktivine oblys ákimi Ómirzaq Shókeev tanystyrdy. Óńir basshysy aýdandy sońǵy úsh jyl kóleminde basqarǵan Jamantai Beisenbaevty qurmetpen zeinet demalysyna shyǵaryp salyp, onyń eren eńbegin erekshe atap ótti. Al, jańa basshynyń aldyna óńirdiń áleýmettik-ekonomikalyq damýy, qoǵamdaǵy birlik pen kelisimdi nyǵaitý boiynsha birqatar mindetter júktedi. Murat Qadyrbek ózine senim artqan barsha azamattarǵa alǵys aityp, Jetisai aýdanynyń damýy men órkendeýi jolynda bar kúsh-jigerin jumsaitynyn jetkizdi.
«Jetisai aýdany erekshe ári eń iri aýdan. Osy aýdannyń damýyna úlken úles qosyp, kóptegen jańa bastamalarǵa muryndyq bolǵan Jamantai Qanaiulyn qurmet demalysyna shyǵaryp sala otyryp, adal atqarǵan eńbegi úshin alǵys bildiremiz. Jańa basshyǵa mańyzdy mindetter júktelip otyr. Arys apaty kezinde ózin isker, batyl basshy ekenin kórsetti. Alda atqarylar ister kóp. Jańa óndiris oryndaryn ashýdy, aýdan turǵyndaryn jumyspen qamtýdy ári qarai júzege asyrý qajet. Aýyl sharýashylyǵyn ozyq tehnologiialarmen jabdyqtap, investitsiia tartý kerek. Qoǵamdyq jáne quqyqtyq tártipti saqtai otyryp, aýdan turǵyndaryna barynsha qolaily jaǵdai jasaýdy tapsyramyn», – dedi oblys ákimi.
Aita keteiik, Murat Bolatuly 1980 jyly Shardara aýdanynda týǵan. Bilimi joǵary, zańger, quqyqtaný magistri. Qazaqstan Respýblikasy Prezidenti janyndaǵy Memlekettik basqarý akademiiasynyń túlegi.
Eńbek jolyn 2002 jyly Qaraǵandy qalasy Qazybek bi aýdanynyń prokýratýrasynyń bólim prokýrory laýazymynda bastaǵan. 2004-2008 jyldary Qazybek bi aýdany prokýrorynyń kómekshisi, Shyǵys Qazaqstan oblysy № 2 Tarbaǵatai aýdandyq sotynyń sýdiasy laýazymdaryn atqarǵan. 2008-2011 jyldary Qazaqstan Respýblikasy Qorshaǵan ortany qorǵaý ministrliginde biýdjettik josparlaý, qarjy-ekonomikalyq qamtamasyz etý jáne memlekettik aktivterdi basqarý, ekonomika jáne qarjy departamenttteri direktorynyń orynbasary, Almaty oblysy Eńbekshiqazaq aýdany ákiminiń orynbasary retinde eńbek etken. 2011-2016 jyldary QR Memlekettik qyzmet isteri agenttiginiń Memlekettik qyzmetti kadrlyq qamtamasyz etý departamenti direktorynyń orynbasary, Almaty oblysy boiynsha departament basshysynyń orynbasary, Soltústik Qazaqstan jáne Mańǵystaý oblysy boiynsha departamentteri basshysy – Tártiptik keńes tóraǵasy, QR Memlekettik qyzmet isteri ministrligi Mańǵystaý oblysy boiynsha departamentiniń basshysy – ádep jónindegi keńes tóraǵasy laýazymdaryn atqarǵan. 2016 jyldan beri Arys qalasynyń ákimi boldy.
